Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Shqipërisë, Edi Rama, ka deklaruar se lufta e Putinit synon gjunjëzimin e bashkësisë euroatlantike, të cilës i përkasim dhe ne, me dy armë, inflacionin dhe krizën energjetike, të krijuara enkas për të goditur çdo familje në të gjithë hartën e Evropës. Gjatë një takimi me qytetarë në Berat, në kuadër të llogaridhënës që po zhvillon në gjithë vendin, kryeministri Rama u shpreh se “kush thotë se nuk ka luftë dhe se këtu problemi është se Shqipëria është në rrezik për shkak të qeverisë, ose nuk di çfarë flet, ose është nën efektin e propagandës së shfrenuar të atyre që e dinë shumë mirë se çfarë flasin, por që nuk punojnë për interesin e vendit. Sepse që ka luftë, kjo nuk diskutohet. Dhe nuk diskutohet që kjo luftë është konceptuar për të hedhur bombat dhe shkatërruar Ukrainën me arsyet e mos arsyet, por njëkohësisht për të gjunjëzuar gjithë perëndimin e Rusisë, ku jemi dhe ne dhe e gjithë bashkësia euroatlantike të cilës ne i përkasim, me dy armë të krijuara enkas për të goditur çdo familje në të gjithë hartën e Evropës”. Kryeministri theksoi më tej se këtu, në Shqipëri, në mes të Evropës, janë disa, që duan me çdo kusht të kthejnë përmbys vendin me pretendimin se nuk ka luftë.
“Dhe është e njëjta gjë që thotë ai që ka nisur luftën në Kremlin, Vladimir Putin: s’ka luftë, është operacion ushtarak për ca nazistë në Ukrainë, ç’lidhje ka Rusia me çmimin e energjisë apo inflacionin. Ka lidhje, të dyja janë të krijuara, fabrikuara enkas për të krijuar një turbullirë e çuar në stres ekstrem popujt, komunitetet, opinionet publike dhe për të goditur qeveritë demokratike nga brenda. Imagjinoni tani kur nga brenda gjenden shërbëtorët të gatshëm të vihen në dispozicion për interesat e tyre personale, njerëz pa fe, pa atdhe”. Ekzistenca e këtyre njerëzve në mesin tonë nuk është më një hipotezë, por fakt.
“Këta njerëz kanë marrë para nga ai vendi që ka nisur këtë luftën, për të rrëzuar qeverinë e vendit të tyre. Për çfarë arsyeje, një vend tjetër jep gjysmë milionë dollarë, sepse ka pasur një garanci, që do të thotë që këta kanë dhënë prova. Dhe sot është shumë e qartë, të paktën njëra nga provat, se si kur ishin në qeveri bashkuan forcat me atë vendin atje, bashkuan votat me përfaqësues të atij që sot ka hapur luftë me perëndimin për të goditur Kosovën dhe Shqipërinë. Kush e mbron me krenari Shqipërinë nuk mund të përzihet me këtë lloj fare të keqe që ka mbirë në 1912 dhe nuk i ndahet këtij vendi dhe nuk i ndahet deri kur jo një shumicë, por të tërë t’i ndahen kësaj fare”, deklaroi Kryeministri.
Ka 1001 arsye për të qenë të pakënaqur, por, theksoi ai, nuk ka asnjë arsye për t’u ndarë me thikën e një konflikti ekstrem: a ka luftë a s’ka luftë dhe a duhet të jemi krenarë për Shqipërinë dhe a duhet ne të jemi një për Shqipërinë.
“Kur flasim atje në gjuhën e tyre, nuk duhet të merremi me çfarë na ndan këtu. Ne atje duhet të merremi me atë që na bashkon ne, me krenarinë e të qenurit shqiptar dhe t’u themi se kur vjen puna popull me popull apo shtet me shtet, ne duam po atë respekt që japim dhe ne nuk pranojmë kurrë që njerëzit tanë të trajtohen si njerëz të dorës të dytë dhe aq më pak të quhen pushtues. Qeveritë shkojnë e vijnë, ndërkohë që emri i Shqipërisë mbrohet dhe lartësohet. (ATSH)
