Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kandidati i PDK-së për kryeministër të ardhshëm të Kosovës, Enver Hoxhaj, i shoqëruar nga nënkryetari Xhavit Haliti dhe Sekretari i përgjithshëm, Uran Ismaili, janë pritur në takim nga kryetari i Tiranës, Erion Veliaj.
Në takim me kryetarin Veliaj, krerët e PDK-së kanë diskutuar për zhvillimet e fundit politike në Kosovë e rajon si dhe nevojën e unifikimit të faktorit shqiptar në mbrojtjen e luftës së drejtë të UÇK-së.
“Ne jemi të sigurtë se kryetari jonë i partisë, presidenti i Republikës dhe të gjithë të tjerët që janë në Gjykatën Speciale do të dalin faqebardhë. Por, mbështetja politike dhe morale nga i gjithë faktori shqiptar ka qenë e rëndësishme për Kosovën. Si dy shtete, për këtë temë është mirë të kemi një qëndrim si Kosovë dhe Shqipëri, sepse lufta e drejtë UÇK-së e ka na ndryshuar rrjedhën e historisë shqiptare.”, ka thënë Hoxhaj duke shtuar se “Në historinë e krijimit të shtetit të pavarur të Kosovës, emrat e Kadriut dhe Hashimit janë prej emrave më të spikatur”.
Kryetari i Bashkisë së Tiranës, Erion Veliaj ka thënë se kryeqyteti shqiptar është i gatshëm për të ngritur fonde për mbrojtjen e ish krerëve të UÇK-së në Hagë.
“Ju jap garancinë time se Tirana, si kryeqytet i të gjithë shqiptarëve, do ta mbështesë këtë kauzë në të gjitha nivelet dhe kapacitetet e saj. Nëse është e nevojshme edhe në mbledhjen e fondeve por edhe në çfarëdo nevoje tjetër që mund të paraqitet gjatë rrugës. Kjo nuk është kauza vetëm e Kadriu apo Hashimit, kjo është kauza e të gjithë shqiptarëve.”, ka thënë Veliaj.
Në fund të këtij takimi, kryetari i Bashkisë së Tiranës, Erion Veliaj e uroi kryetarin Hoxhaj për kandidaturën e tij për kryeministër të Kosovës.
