Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Federata e Sindikatave të Shëndetësisë e Kosovës, ka reaguar pas deklaratave të kryeministrit Albin Kurti, të bëra në seancën e Kuvendit, ku ka përmendur se disa sindikata kishin nënshkruar marrëveshje me koalicionin PAN në fushatën elektorale të vitit 2017. Sipas FSSHK-së, ato që ka thënë sot Kurti nuk qëndrojnë, ndërsa e kanë quajtur gjuhë fyese e urryese ndaj punës së tyre. “Njoftojmë opinionin e gjerë publik se nga ato çfarë thotë kryeministri Kurti asnjëra nuk qëndron, i njëjti me gjuhë të ashpër e urryese njollos punën tonë, duke tentuar që në këtë mënyrë të shpërqendrojë opinionin rreth kërkesës sonë legjitime: Rritjen e pagës dhe miratimin e Ligjit të Pagave, ku për realizimin e të cilave do t’i përdorim të gjitha mjetet legjitime të reagimeve sindikaliste, pavarësisht presionit dhe linçimeve karshi nesh!”, thuhet në reagim. FSSHK-ja në këtë reagim ka sqaruar, sipas tyre, atë çfarë kishte ndodhur në vitin 2017 me partitë politike.
“Për të qenë të qartë kështu duke e demantuar atë se çka Kurti përmendi sot, ju rikujtojmë se: më 22.05.2017 Federata e Sindikatave të Shëndetësisë e Kosovës u ka dërguar kërkesë prej 13 pikësh 5 partive politike: LDK, PDK, AAK, LVV, Nismës, e më 23.05.2017 AKR-së e PD-së po ashtu, ku në pikën 5 të kësaj kërkese FSSHK-ja cek Ligjin e Pagave, duke kërkuar përcaktimin e koeficienteve për të gjithë të punësuarit në sektorin publik, me theks të veçantë punëtorët shëndetësorë, mirëpo me sa po shihet sikurse atëherë, as sot nuk ka gjetur vullnetin e mirë kryeministri me partinë e tij që t’u vihet në ndihmë punëtorëve shëndetësorë me qëllim që t’u përmirësojë mirëqenien!”, thotë FSSHK-ja. Ata në fund kanë paralajmëruar grevë, pasi kryeministri, nuk po merret me kërkesat e tyre. “A është e drejtë kjo çka kemi kërkuar? PO është, ka qenë e do të jetë..! Dëshprimisht, duke qenë se Kurti është në rrugë për të dështuar, njëkohësisht duke dezinformuar në të gjitha aspektet, atëherë s’i mbetet asgjë tjetër, vetëm shkatërrimi i sindikatave. Shihemi në grevë!”, thuhet në fund të reagimit.
