Hoti në Samitin e Diasporës Shqiptare kërkon themelimin e një ministrie të përbashkët të kulturës

20/11/2016 Institucionet

Zëvendësministri i Kulturës, Rinisë dhe Sportit, Rexhep Hoti mori pjesë në Samitin e Diasporës Shqiptare, të organizuar nga kryeministria e Shqipërisë.

Duke folur për kulturën, në panelin e organizuar në kuadër të samitit, zëvendësministri Hoti tha se gjatë kohës sa ishim të ndarë e të pushtuar, kultura ishte trungu ynë në kuptimin e plotë të fjalës në trojet shqiptare e në diasporë.

Hoti hodhi idenë që të dyja qeveritë, ajo e Kosovës dhe e Shqipërisë të marrin nismën për themelimin e një ministrie të përbashkët të kulturës.

“Ne mund të kemi një trung institucional me aq degë sa është e nevojshme brenda të dyja republikave shqiptare, fjala vjen, në Tiranë e Prishtinë, si dhe duhet të kemi edhe degëzime me trojet shqiptare jashtë hapësirave të të dyja republikave, si dhe në diasporë e në Turqi”.

Hoti tha se trungu ynë kulturor nuk nënkupton bashkëpunim bilateral sepse kultura nuk mund të ndahet si politike, ajo është vlerë e një trungu dhe u takon të gjithë shqiptarëve me ose pa kufij.

“Në këtë drejtim nuk mund të kuptoj pse duhet t’i kemi dy ministri të kulturës e lëre më dy akademi apo institute tjera me karakter kulturor”, tha Hoti.

Në këtë pikë, zëvendësministri potencoi se kultura do të kishte hapësirën e plotë për të gjitha komunitetet jo shumicë, e të cilat janë pasuri e madhe e republikave shqiptare.

Sipas tij, liria e plotë e komuniteteve jo shumicë në kuadër të shteteve shqiptare është kuptimi më thelbësor i lirisë në hapësirat evropiane e nesër do të jetë sfidë për vetë Bashkimin Evropian i cili në kuptimin e legjislativit është larg standardeve të tilla, që i kemi ofruar në Kosovë.

Tutje, duke folur për kulturën shqiptare, zëvendësministri i MKRS-së tha se ajo në të vërtetë është njëra prej fundameteve boshtore mbi të cilat qëndron sot Bashkimi Evropian si formë e qytetërimit.

“Ne nuk e dëshirojmë integrimin evropian për të qenë të tillë. Ne jemi vlera evropiane sot e këtë ditë më shumë sesa të gjitha shtetet anëtare të Bashkimit Evropian’.

Ndryshe, samiti i ardhshëm i diasporës shqiptare do të mbahet si organizim i institucioneve të Kosovës.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara