Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot në Budrikë të Vitisë, është bërë inaugurimi i parkut industrial, ku prerjen e shiritit e bëri kryeministri i Republikës së Kosovës, Albin Kurti, kryetari i komunës së Vitisë, Sokol Haliti dhe Ministrja e Zhvillimit Ekonomik, Rozeta Hajdari. Gjatë kësaj ceremonie kryeministri i Kosovës, Albin Kurti tha se parku industrial i ndërtuar në Budrikë të Vitisë, do të jep një kontribut të çmuar për zhvillim ekonomik dhe rajonal duke përmendur se këtu janë bërë investime kapitale prej 1,7 milion euro dhe se parku në fjalë, ka një hapësirë prej 15,5ha. Ai tha se ky projekt, do të mbështes investimet e përgjegjshme dhe të qëndrueshme të bizneseve vendore, nga diaspora por edhe të huaja si dhe sipas tij do të nxisë veprimtaritë prodhuese dhe përpunuese. Kurse kryetari Haliti foli rreth inaugurimit të këtij projekti. “Me padurim e kemi pritur finalizimin e këtij projekti si bizneset ashtu edhe qytetarët, pra Vitia dhe gjithë sektori i lindjes dhe atë pa dallime. Kjo për shkak të mungesës që kemi pasur dhe dëshirës për rrumbullaksim të procesit të prodhim-përpunimit dhe për shkak të potencialeve që kemi si regjion, nevojës së punësimit dhe përgatitjes me kompetencë të të rinjve”, u shpreh kryetari Haliti. Ai tha se prioritet i komunës së Vitisë, është thithja e investimeve. Kryetari Haliti, falënderoj të gjithë ata që kanë mundësuar realizimin e këtij projekti pa dallime. Megjithatë, i pari i Vitisë, pati edhe një thirrje publike dhe atë që të ketë rritje të hapësirës, duke potencuar se kjo pjesë është qendër e lidhjes që graviton disa regjione të ndryshme dhe ka potenciale të mira. Ndërkaq, një fjalë rasti e tha edhe Rozeta Hajdari, Ministre e Zhvillimit Ekonomik. Përndryshe, në këtë ceremoni të pranishëm ishin edhe shumë qytetarë, deputetë të Republikës së Kosovës dhe të tjerë.
