Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mustafë Krasniqi është një nga shkrimtarët, që me përkushtim të veçantë ka shkruar e vazhdon të shkruajë qoftë poezi, qoftë prozë, duke vënë theksin dhe shquarsinë tek idealet e lirisë, të bashkimit të popullit shqiptar dhe të trojeve të Shqipërisë në një përbashkësi të qëndrueshme prej gjuhe e gjaku, terrori, historie e përpjekjesh shekullore mbijetese e krenarie ilire, arbërore e shqiptare.
Ai jo vetëm poezi, por edhe analiza të shumta ka shkruar qofshim me përmbajtje thjesht atdhetare, qofshin me përmbajtje politike shoqërore, duke e vënë theksin tek ato plagë të dhembshme të Kosovës dhe të trojeve të tjera të Shqipërisë, që i kanë pushtuar pushtuesit serbë, maqedonas, grekë dhe malazezë. Ai ka shkruar edhe recensione letrare, sado që poezia është përkushtimi e motivimi themelor i tij si krijues i veprës shpirtërore.
Mustafë Krasniqi duke qenë i lidhur deri në palcë me Atdheun, ia ka kushtuar atij vitet më të mira të jetës së tij: rininë, i organizuar me një përkushtim të madh në Lëvizjen për Republikën e Kosovës, organizatë kjo, atdhetare, që në rrethanat e atëhershme kishte si synim krijimin e një republike për të gjithë shqiptarët nën ish Jugosllavinë e atëhershme, me të drejtë për vetëvendosje dhe krijimin rrethanave për bashkim me Republikën e Shqipërisë, pra për jetësimin e Shqipërisë të tërësishme e të natyrshme.
Mustafa si atëherë edhe tani qoftë duke krijuar poezi, qoftë prozë, qofshin krijimet të tjera, analizat dhe recensionet i jetëson me frymëzime patriotike e humanitare, prandaj vijnë deri tek lexuesi natyrshëm, të qarta, të kapshme, të pranueshme me porosi të drejtpërdrejta, të shëndetshme në kuptimin njerëzor dhe atdhetar.
Poezia e tij është e veshur plotpërplot me shije artistike, por mbi të gjitha është poezi e përkushtimit atdhetar, ndaj ai natyrshëm shkruan për heronjtë e dëshmorët, për idealet, për luftërat e përpjekjet e popullit shqiptar për demonstratat shqiptare në Prishtinë, për heroin e shokun e tij Afrim Zhitia.
Tani Mustafë Krasniqi nxjerrë në dritë një vepër vështrimesh letrare për një pjesë të krijimeve letrare të disa poetëve shkrimtarëve në diasporë. Libri titullohet: “Vështrime kritike për krijimtarinë letrare në diasporë”
Ky libër vjen natyrshëm deri te botimi, i gdhendur dhe përpunuar për t`u kuptuar sa më qartë, qoftë nga nxënësit dhe studentët, qoftë nga studiuesit apo edhe njerëzit e profesioneve të ndryshme, të cilët kanë dëshirë për të pasuruar diapazonin e tyre të njohurive dhe vlerave letrare, por edhe atdhetare.
Ky libër do t`ju vijë në ndihmë në radhë të parë poetëve, veprën të cilëve e ka marrë në shqyrtim Mustafë Krasniqi.
Këtë libër që po e publikojmë, pasi të botohet dhe të lexohet do të jetë pikërisht lexuesi ai që do ta vlerësojë, megjithëkëtë shpreh bindjen time se Mustafë Krasniqi e ka shkruar një vepër shumë të rëndësishme vlerësimesh letrare, e cila do ta pasurojë fondin e librave të mirëfillta për letërsinë.
Uroj autorit që të shkruajë sa më shumë dhe të ketë sukses si në krijimtari ashtu edhe në jetë përgjithësisht.
