Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nuk ka asnjë dyshim, edukimi media është bërë imperativ i kohës, sigurisht jo vetëm për kombin tonë të pa konsoliduar në aspektin e mirëfilltë kombëtar. Gjithashtu nuk ka asnjë dyshim të vetëm se edhe si komb jemi sulmuar nga shumë drejtime armiqësore e keqdashëse, sulme këto që njerëzve tanë ua kanë minimizuar dashurinë për kombin e atdheun, për kulturën e traditën kombëtare, për dijen e arsimin e mirëfilltë, për edukatën e punën, për progresin e zhvillimin tonë. Por, athua na mungojnë vetëm edukimi medial e politik në shoqërinë tonë që luftën për karrige e bëjmë më karrige mbi kokat e njerëzve me të cilët duhet kërkuar e marrë pushtetin?! Që çdo debat më lehtë e zhvillojmë më sharje, me grushte e karrige, me shishe molotovi e mjete tjera të dhunës sesa me gjuhë e mjete të tjera pozitive që çojnë kah progresi e zhvillimi. Kjo është çështje që kërkon përgjigje e angazhim serioz nga secili njeri i angazhuar politikisht në fusha përkatëse të shoqërisë e sidomos të atyre që janë të angazhuar në jetën politike e publike në shoqërinë tonë.
Ky stagnim i përgjithshëm ka kohë që po troket në ndërgjegjen tonë, por ndërgjegjja e jonë me shumë halle të mëdha individualiste (për pushtet e pasuri, për ngritje pa meritore në çdo segment të jetës), po duket sheshazi se është më shumë sesa e përgjumur për t’i parë e ndal zhvillimet negative brendapërbrenda qenies sonë kombëtare dhe për t’i stimuluar zhvillimet pozitive që aq shumë i duhen shoqërisë sonë. E gjithë çështja është, sa jemi dhe a jemi të gatshëm për ndryshime pozitive? Kur as gjësë më të thjeshtë që ndodh në mesin tonë (siç është lufta me karrige) nuk lodhemi t’ia gjejmë shkakun apo arsyen e ndodhjes së saj. Mbase shkaku kryesor na qenka mungesa e edukimit medial ose ata të tjerët që po na duan të keqen e partisë sonë? Ky është shpjegimi më i keq i mundshëm i fenomenit më të thjeshtë dhe i cili nuk është i ri. Kur ketë më të thjeshtin problem nuk dimë e dom ta trajtojmë seriozisht, çka të themi për të tjerat që vërtetë janë të ndërlikuara? Problemi është: çka të presim nga ky soj i njerëzve kur vishen me pushtet sot apo nesër?
Jo, problemet shoqërore janë më të thella, ato duhet të kërkohen në gjenezën e tyre, në majat e të gjitha pushteteve të pa merituara, mbase edhe më larg se kaq.
