Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Këshilli i Çështjeve të Përgjithshme të Bashkimit Evropian ka miratuar në Bruksel konkluzionet për procesin e zgjerimit, ku një fokus i veçantë i është kushtuar Kosovës dhe Serbisë. Në dokumentin e miratuar, vendet anëtare të BE-së kanë rikujtuar përkushtimin për zgjerimin, duke e bazuar këtë në meritat individuale të vendeve që aspirojnë integrimin, dhe kanë theksuar rëndësinë e zbatimit të reformave dhe zgjidhjes së mosmarrëveshjeve bilaterale. Në konkluzionet e BE-së, Kosova dhe Serbia janë ftuar të zbatojnë Marrëveshjen për rrugën drejt normalizimit të raporteve, të arritur në shkurt dhe mars 2023, pa vonesa dhe parakushte. BE-ja theksoi se përparimi në këtë marrëveshje mbetet kusht kyç për afrimin e të dyja vendeve me bllokun evropian. Nga Kosova, Bashkimi Evropian kërkon që të nisë pa vonesa themelimin e Asociacionit të Komunave me Shumicë Serbe. Në konkluzione thuhet qartë se Qeveria e Kosovës duhet të procedojë me draft-statutin e BE-së në Gjykatën Kushtetuese të Kosovës. Në të njëjtën kohë, BE-ja ka konfirmuar se masat ndaj Kosovës janë të kthyeshme dhe se ato do të hiqen gradualisht, paralelisht me hapat që Kosova ndërmerr për të shtensionuar situatën në veri.
