Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Anëtarët e Komisionit për Punë të Jashtme të Kuvendit të Kosovës kanë shtyrë për një takim tjetër, saktësisht më datën 15 janar 2018, për ta proceduar në Kryesinë e Kuvendit raportin së bashku me Marrëveshjen për Demarkacion me Malin e Zi. Shtyrja është bërë për faktin se Prokuroria është duke hetuar dyshimet për manipulim me dokumente e po ashtu që Komisioni për Mirëmbajtjen e Kufirit Shtetëror në krye me Shpejtim Bulliqin kanë prezantuar edhe disa fakte të reja, që, sipas tyre, vërtetojnë se territori për të cilin po diskutohet tash e dy vjet ishte dhe është pjesë e Republikës së Kosovës. Ndërkaq, ata kanë akuzuar Komisionin paraprak që nuk ka bërë demarkacion dhe as shënjim të vijës, por vijë të re kufitare.
Kryetarja e Komisionit për Punë të Jashtme të Kuvendit të Kosovës, Vjosa Osmani, tha se Komisioni do ta mbajë edhe një takim tjetër më 15 janar 2018, ku do të merret vendimi për dërgimin e Marrëveshjes për Demarkacion në seancë. Po ashtu, sipas saj, ky Komision pritet të mos japë rekomandime për deputetët se a ta votojnë apo jo ratifikimin e Marrëveshjes. “Sot Komisioni ynë rekomandoi që të shqyrtohet Marrëveshja, por të mos japim rekomandim nëse duhet të votojmë pro apo kundër marrëveshjes. Më 15 janar ta vendosim për procedim në seancë dhe të vendosim se si do të procedohet”, tha Osmani.
