Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qendra Kryesore e Mjekësisë Familjare në Viti në bashkëpunim me Drejtorinë Komunale të Arsimit, ka shënuar Ditën Botërore kundër Duhanit me disa aktivitete. Dr.Gentianë Ferati, nga QKMF në koordinim me menaxhmentin e shkollës fillore “Bafti Haxhiu” në Viti, ka mbajtur ligjëratën kundër duhanit me nxënësit e klasave të IX-ta. Pastaj, në qendër të qytetit punëtorët shëndetësorë kanë shpërndarë broshura për qytetarët e rastit dhe janë dhënë këshilla kundër pirjes së duhanit. Këtë aktivitet e kanë përshëndetur kryetari i Komunës së Vitisë z.Sokol Haliti, drejtoresha e DKA znj.Arta Ajeti dhe drejtoresha e QKMF-së dr.Vjollca Kadolli-Halili. Pjesëmarrësit thanë se qëllimi i shënimit të kësaj dite është rritja e ndërgjegjësimit të popullatës për rreziqet që mund të sjell përdorimi i duhanit. Përndryshe, pirja e duhanit është shkaktari kryesor i sëmundjeve dhe vdekjeve të parakohshme, është shkaktari i dytë i vdekjeve në botë, ku çdo vit në botë vdesin rreth 8 milion njerëz, si pasojë e tymosjes së duhanit, numër ky që bazuar në trendin aktual, pritet të dyfishohet gjatë 20 vjetëve të ardhshme. Çdo 6.5 sekonda në botë vdes një njeri nga dëmet që sjell tymosja e duhanit. Duhanpirësit janë dy herë më të rrezikuar nga sulmi në tru, katër herë nga sëmundjet e zemrës se sa jo-duhanpirësit, ndërkohë 22 herë më shumë gjasa të zhvillojnë kancer të mushkërive sesa jo-duhanpirësit, si dhe rreth 25% të të gjitha vdekjeve nga kanceri në botë shkaktohen nga përdorimi i duhanit. Që nga viti 2013 Kosova ka të miratuar Ligjin për Kontrollin e Duhanit, i cili ligj ndihmon në uljen e konsumit të duhanit, sidomos në mesin e të rinjve.
