Kori i Filarmonisë së Kosovës u prezantua suksesshëm në Britani

08/05/2018 Institucionet

Kori i Filarmonisë së Kosovës, për herë të parë u prezantua në një turne në Britaninë e Madhe me projektin “Kthim në të kaluarën: Një rrugëtim muzikor”, ku mbajti tri koncerte. Koncertet u mbajtën me 5 dhe 6 maj në Hasting në bashkëpunim me Korin dhe Orkestrën e Hastingun dhe ndërkaq koncerti i tretë më 7 maj u mbajt në Londër. Dirigjenti Rafet Rudi turneun në Britani të Madhe e konsideroi mjaft ambicioze pasi që Filarmonisë së Kosovës iu mundësua të paraqitet para auditoriumit britanik me një program të pasur me muzikë korale shqiptare. Turneu sipas Rudit ka paraqitur një program që ka përfshirë shumë nga fusha e krijimtarisë tonë. Ndërsa Adelina Paloja, soliste soprano, tha se jemi munduar të prezantohemi sa më mirë dhe ta përfaqësojmë Kosovën në Britaninë e Madhe. Në këto paraqitje në Britani të Madhe, Kori i Filarmonisë së Kosovës prezantoi vepra të kompozitorëve, si Lorenc Antoni, Gjergj Danush Llapacaj, Jan Kukuzeli,Rexho Mulliqi, Rafet Rudi, Baki Jashari, Thomas Simaku e Mendi Mengjiqi. Ndërkaq, u interpretuan edhe vepra të kompozitorëve të huaj si Tomas Luis de Victoria, Benjamin Britten, John Dowland dhe Jake Runestad. Në këtë prezantim të Korit të Filarmonisë së Kosovës në Britani të Madhe mori pjesë edhe zëvendësministri i Kulturës, Rinisë dhe Sportit, Rexhep Hoti, në shoqërim të ambasadorit të Kosovës në Mbretërinë e Bashkuar, Lirim Greiçevci. Në fjalën e tij përshëndetëse zëvendësministri Hoti e konsideroi se pjesëmarrja e Korit të Filarmonisë së Kosovës në Britaninë e Madhe, konkretisht zëri i Korit të Filarmonisë është prezantimi më i mirë i Republikës së Kosovës si shtet i ri. Hoti e vlerësoi se Kori i Filarmonisë së Kosovës është në nivelin e koreve që mund të konkurrojnë secilin kor në Evropë dhe është njëri ndër koret më të kompletuara në Ballkan. Në bisedat që ka zhvilluar me përfaqësuesit e Filarmonisë, zëvendësministri premtoi se çështja e pagave do të përfundojë ashtu siç janë pajtuar edhe nga ana e ministrisë. Hoti premtoi se MKRS-ja do të bëjë çmos që zëri i Korit të Filarmonisë të jetë prezent në të gjitha qendrat evropiane e botërore sepse janë një kolektivë artistësh që i bën nder artit muzikor, e veçmas shoqërisë dhe pavarësisë së vendit tonë. Zëvendësministri dhe ekipi i Korit po ashtu pas turneut u takuan edhe me bashkatdhetarë të cilit kishin përgatitur një organizim në lokalet e njohura të Rita Orës.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara