Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Republikës së Kosovës, Ramush Haradinaj, priti luftëtarin e lirisë, gjeneralin e luftës dhe kryetarin e Skenderajt, Sami Lushtaku dhe deputetin e Kuvendit të Republikës së Kosovës, Mërgim Lushtaku, me të cilët ka biseduar për aktualitetin politik të vendit, thekson komunikata. Në takim u bisedua për dinamikën e re që është instaluar në qeverisje, duke i dhënë prioritet zgjidhjes së temave të rënda, që janë neglizhuar nga qeverisjet e kaluara. Në takim u fol për trajtimin e kategorive të luftës, ndërsa kryeministri Haradinaj i njoftoi bashkëbiseduesit se ka ndërmarrë hapa dhe veprime konkrete, që veteranët dhe invalidët e luftës si dhe kategoritë tjera përfituese nga shteti, të mos presin me muaj pagat dhe pensionet e tyre si dhe për përgatitjet që po bëhen për vitin jubilar, dhjetë vjetorin e pavarësisë së vendit, që erdhi si rezultat i luftës së UÇK-së dhe mbështetjes së aleatëve të Kosovës, ShBA-së, Britanisë së Madhe, Gjermanisë dhe shteteve tjera të perëndimit.
“Takova Gjeneralin e luftës Sami Lushtakun sot kur po e shënojmë përvjetorin e 20-të, të rënies për liri të Adrian Krasniqit dhe më këtë dua të jap mesazhin se vlera më sublime dhe e arritura më e madhe e shqiptarëve, pas Pavarësisë së Shqipërisë më 1912 është pikërisht lufta çlirimtare dhe shtetndërtimi i Kosovës, prandaj, të gjallët dhe të rënët e kësaj lufte duhet të jenë udhërrëfyes për lidershipin e vendit”, ka thënë kryeministri Haradinaj. Kryetari i Skenderajt, Sami Lushtaku, dhe deputeti Mërgim Lushtaku janë zotuar se kryeministri Haradinaj do ta ketë mbështetjen e tyre të pakursyer politike, në përmbushjen e mandatit qeverisës në mënyrë shembullore, e në shërbim të të gjithë qytetarëve të vendit, thuhet në komunikatë.
