Me dhembje e pikëllim të thellë, morëm lajmin për ndarjen nga jeta të gazetarit të mirënjohur, ish drejtorit të përgjithshëm të RTK-së, mikut tim të çmuar, ferizajasit të shquar, Sylejman Shaqiri.
Sa e rëndë është kjo ditë, ky pikëllim për amshimin e Sylës, të rrallit personalitet që gjithë jetën e tij, rrezatoi mirësi, virtyte të çmuara njerëzore, vlera të dëshmuara profesionale e mbi të gjitha misionin që ai kishte gjithë jetën, misionin për të vërtetën, për informimin e publikut.
Sot Ferizaj është më i varfër, pa emrin e tij, pa Sylejman Shaqirin, që mishëronte ferizajasin e shquar e të përkushtuar në profesion. Gazetaria shqiptare humbi një nga emrat e përveçëm të saj, porse krenarë na mban trashëgimia e tij, vepra jetësore që la prapa, si udhërrëfim për brezat e sotëm e të së ardhmes.
Lamtumirë miku im, Sylejman Shaqiri!
Lamtumirë ferizajas i rrallë!
Ngushëllime familjes Shaqiri, kolegëve të profesionit, miqve e të njohurve të të ndjerit! Shpirti i tij, u prehtë në paqen e parajsës së paskaj, thuhet në telegramin engushëllimit të kryetarit të komunës së Ferizajt, z. Agim Aliu.
Familja e të ndjerit në bashkëpunim me Komunën e Ferizajt dhe Klubin e Gazetarëve “Haki Braha” në Ferizaj sot më 19 Prill 2025 (E Shtunë) në Teatrin “Adriana” në Ferizaj, organizuan MBLEDHJE KOMEMORATIVE, në kujtim të jetës dhe veprës së tij.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
