Kryetari Aliu, prezantoi punën njëvjeçare të qeverisjes së tij

31/05/2021 Institucionet

Këtë të hënë është mbajtur mbledhja e katër e rregullt e Kuvendit të Komunës së Ferizajt, e kryesuar nga Kryesuesja e Kuvendit Kristina Gashi-Bytyqi. Në këtë mbledhje morri pjesë edhe Kryetari i Komunës së Ferizajt, Agim Aliu, nënkryetari Arton Gavazi, nënkryetari për komunitete Florim Bajrami si dhe drejtorë të drejtorive komunale. Në këtë mbledhje janë diskutuar çështje të shumta, por ajo e cila më se shumti ngjalli debat ishte raporti i punës për vitin 2020. Me këtë rast Kryetari i Komunës së Ferizajt, Agim Aliu me një fjalë rasti i është drejtuar këshilltareve komunale, ku fillimisht ka shprehur ngushëllime për të gjithë familjet që gjatë pandemisë kanë humbur më të dashurit e tyre. “Ferizaj dhe ferizajasit humbën dhe u dëmtuan ekonomikisht, u mbyllën e u hodhën në vështirësi nga pandemia globale COVID-19, që padrejtësisht, me dhembje, frikë e shumë sfida, shënoi siç nuk deshëm, vitin 2020. Edhe sot, kur jemi në një moment të rëndësishëm të spikamës së punës së qeverisjes lokale, atë të raportimit mbi punët dhe aktivitetin e kryer më 2020, pa më të voglin dyshim, sfidat e pandemisë ishin ato që karakterizuan gjithë kalendarin vjetor. Megjithatë, ne nuk ndejtëm duarkryq. Qytetarët e bizneset e vëna në vështirësi, përjetuan dorën e kujdesit nga Komuna, nga besimi që na dhanë e që u përkthye në kujdes për ta, në brengë tonën për shëndetin e qytetarëve, për të cilën nuk kursyem asgjë e vetëmohues punuam gjithë vitin 2020. Në këtë pikëpamje, për t’i lënë një gjurmë kohës që kaluam, dua të nënvizoj faktin e pamohueshëm, bindjen e ngulitur thellë, përjetimin më të sinqertë të qytetarëve, se qeverisja jonë, askujt, në asnjë rast, për asnjë arsye, nuk i tha JO në kuptimin e mbështetjes, dorës së zgjatur për ndihmë e përkrahjes për rimëkëmbje nga pandemia”, është shprehur Kryetari Aliu, përderisa ka shtuar se mbi 5000 familje që u ndihmuan me pako ushqimore, higjienike, pajisje teknologjike, materiale didaktike. “Në mesin e tyre nga çdo komunitet e kategori e shoqërisë, janë fakt i pamohueshëm pikësëpari për bashkëndjesinë tonë për rrethanat e ankthshme që krijoi pandemia, e me patjetër, edhe solidariteti që karakterizon bizneset ferizajase e donatorët e shumtë, të cilat pa kursim dolën në ndihmë të qytetarëve. Edhe Shtabi Emergjent Lokal i themeluar për këtë qëllim, ishte e mbetet në krye të detyrës dhe përgjegjësisë ligjore e profesionale për të orientuar drejtë veprimet në dobi të mbrojtjes së shëndetit publik. Në këtë kuptim, të tri nivelet e shëndetësisë u bënë bashkë, me mjekët e infermierët heronj, për të ofruar mijëra shërbime shëndetësore për pacientët e infektuar me COVID-19 dhe sëmundjet tjera, pa lënë anash shërbimin unik e të parin në vend që krijuam qysh në ditët e para të pandemisë, atë të Shërbimit Psikologjik-Logopedik Online, profesionistët e së cilës gjej rastin t’i falënderoj publikisht, për kujdesin dhe kontributin në ruajtjen e shëndetit mendor të qytetarëve. Falënderime për kontributin në menaxhimin e suksesshëm të pandemisë, i rezervoj natyrisht të parëve, heronjve mjekë e infermierë nga të tri nivelet e shëndetësisë në Ferizaj, stafit teknik e mbështetës shëndetësor, policë e punonjës të mirëmbajtjes, juve anëtarë të Kuvendit për vendimet në mbështetje të nismave për pandeminë dhe jo vetëm, zjarrfikës e inspektorë si dhe punonjësve të çdo uniforme që nuk kursyen asgjë për t’ia dal bashkërisht mbanë ndaj vështirësive që krijoi armiku i padukshëm”, tha numri një i Ferizajt, Agim Aliu. Kryetari tutje ka thënë se pandemia shpërfaqi edhe dobësitë e mangësitë e sistemit shtetëror. “Mungesa e oksigjenit për pacientët në spitale, mungesa e veturave për organet e sigurisë, dhe vargu i gjatë i mungesave dhe dobësive tjera, na vendosën para një vendimmarrje përtej kompetencës sonë, por gjithmonë për qytetarët, atë të sigurimit të tyre, që asnjë pacienti të mos i mungoj oksigjeni e një shtrat për kurimin nga ky virus e asnjë zyrtar i forcave të rendit të mos vuaj kapacitet e vogla operative për të kryer detyrën në zbatim të masave për mbrojtjen e shëndetit publik. Thënë troç, nuk pritëm as nga Prishtina, pra nga Qeveria, as nga kompetentët e çfarëdo fushe që me gjithë nevojën urgjente, nuk hodhën me kohë hapin e duhur, por morëm situatën në dorë për t’i shërbyer nevojave urgjente të qytetarëve. Natyrisht, me bindjen e vullnetin që të bëjmë më të mirën, e që si veprime tona, mbajtën gjatë e lartë Komunën e Ferizajt, në majën e komunave me menaxhimin më të suksesshëm të pandemisë në nivelin lokal”, potencoi, Kryetari Agim Aliu. Gjatë këtij raporti para asamblistëve, numri një i qytetit të Ferizajt, Agim Aliu, është ndalur edhe tek investimet kapitale që janë bërë gjatë vitit të kaluar. Ai ka përmendur projektet të shumta që janë realizuar e që po realizohen çdo ditë në qytetin tonë. “Edhe pse viti 2020 solli vështirësi pafund, shtrëngime financiare, rënie të inkasimeve, natyrisht të mirëkuptuara në të tilla situata, arritëm të përmbushim në qind për qindëshin e saj, platformën tonë investive për Ferizajn që duam dhe na dhanë besimin ferizajasit. Kundruar në rrafshin e infrastrukturës rrugore, jo vetëm 2020-ta, por gjithë mandati ynë qeverisës ishte e do të mbetet mandat i transformimit të Ferizajt. Këtë e thonë dhe përjetojnë më së miri, secili ferizajas që i gëzohet të mirës publike. I paparë ndonjëherë jo në Ferizaj, por në gjithë vendin është edhe vepra që paraqet art në të projektuarit dhe realizuarit e infrastrukturës rrugore, ajo e Nënkalimit në Varosh-Nikadin, që pa mëdyshje, përveç që heq atë zonë nga harta simbol i vdekjeve aksidentale nga treni, i jep tashmë rreze drite e zhvillimi gjithë skajit në atë anë të Ferizajt. Asgjë nuk na ndali edhe më 2020-tën që të përfundojmë suksesshëm një nyjë të rëndësishme që i jep vizion të ri zhvillimor gjithë zonës, bizneseve dhe qytetarëve që banojnë në atë zonë, sikurse pjesa integrale e “Bashkimit të Qytetit”, pra projekti i rregullimit të Rrethit të Madh në afërsi të Spitalit, zonë të cilën e rikonceptuam tërësisht duke i shtuar edhe Parkun e Ri të Qytetit me këndin e lojërave, të cilat pa mëdyshje kemi synimin ta zgjerojmë edhe më, në të ardhmen. Po kështu, edhe nënkalimi që lidh rrugët “Liman Rekaj”, “Bajram e Gursel Sylejmani” dhe “Besim Rexhepi” tek Plus Marketi, më 2020, avancoi punimet e që pak ditë më parë përuruam edhe këtë vepër madhështore të infrastrukturës rrugore. Secili nga ju ka shkelur e ka parë për dekada, sheshet e trotuaret në gjithë zemrën e qendrës së Ferizajt. Të mjerueshme për dekada, ato i transformuam që nga skaji i rrugës “Agim Matoshi” e deri tek Sheshi “Ismail Kadare”, pra në gjithë qendrën e qytetit, në një rrip shëtitës modern, trotuare për fëmijët, nënat, pleqtë, burrat e gratë e Ferizajt, të cilëve iu munguan me standardin e duhur, për dekada me radhë. E kemi thënë shumë herë, infrastruktura sjellë zhvillim, e zhvillimi mirëqenie. Pikërisht nisur nga kjo maksimë, gjatë vitit 2020, për t’i dhënë qytetarëve lehtësinë e qarkullimit e bizneseve mundësi të shtuara, asfaltuam dhjetëra rrugë në zonën urbane dhe po kështu edhe në zonën rurale. Kësaj i shtuam edhe sinjalistikën rrugore sipas standardit që Ferizaj nuk e pa të realizohej më parë. Investuam gjithashtu në ndriçimin e rrugëve në lagjet e qytetit dhe fshatrave, duke shtrirë rrjetin e ndriçimit publik për 109 Km vetëm për vitin 2020”, ka thënë Aliu. Kryetari i Ferizajt, Agim Aliu, është ndalur edhe tek të gjitha projektet të tjera në fusha të ndryshme, si në kulture, arsim dhe shëndetësi. Në mbledhjen e sotme të Kuvendit të Komunës se Ferizajt, janë miratuar edhe disa propozime të Drejtores së Financave Sebahate Ajeti-Sadiku siç ishte propozim-vendimi për bartjen e mjeteve të të hyrave vetanake të vitit 2020 në vitin 2021 në vlere prej 661,268.78 euro si dhe propozim-vendimin për transferin e mjeteve sipas buxhetit të vitit 2021. Ndërkaq drejtori i pronës, gjeodezisë dhe kadastarit Sabri Murseli, ka bërë dy propozim-vendime për shpalljen e interesit të përgjithshëm të ngastrave kadastrale 1091-1 në zonën kadastrale në Ferizaj, si dhe për pjesët e këtyre ngastrave 630-0,632-0,633-0,634-o në zonën kadastrale në Komogllave. Po ashtu u diskutua edhe propozim-vendimi për dhënien në shfrytëzim afatgjatë të pjesës së parcelës 629-1 të zonës kadastrale në Babush të Ri.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara