Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i PD-së zyrtare, Lulzim Basha është vënë përpara përgjegjësisë për humbjen e thellë që pësoi në zgjedhjet e pjesshme vendore të 6 marsit. Në mbledhjen e grupit parlamentar, e cila zgjati deri pas mesnate, deputetë të ndryshëm i kanë kërkuar atij dorëheqjen. Burimet kanë bërë të ditur se një pjesë ka propozuar madje edhe ribashkimin me pjesën që mbështesin Berishën me të cilin desh u vranë për zyrat në 8 janar. Në votimet e së dielës, përfaqësuesit e Partisë Demokratike, përveç Rrogozhinës dhe Dibrës, ku kandidati Luan Haka, u nda me disa dhjetëra vota nga i dyti në garë, të katër bashkitë e tjera, grumbulluan shumë pak vota. Basha mësohet të ketë deklaruar në mbledhjen e grupit parlamentar se “6 marsi ishte kurth pas 8 janarit dhe ne u vendosëm para detyrimit për të marrë pjesë në zgjedhje”, duke akuzuar në këtë mënyrë kryetarin lir Meta se kishte dekretuar papritur zgjedhjet e pjesshme të cilat ai i kishte mbajtur të bllokuara për një kohë të gjatë. Edhe në deklaratën e djeshme për mediat, Basha u përpoq që të gjente shkaqet e humbjes jashtë përgjegjësisë së Partisë Demokratike. Por deputetë të ndryshëm nuk kanë qenë të këtij mendimi. Nënkryetari i parlamentit dhe njëri nga 4 nënkryetarët e PD, Agron Gjekmarkaj, ka njoftuar dorëheqjen nga të gjithë funksionet politike, në shenjë përgjegjësie për rezultatin.
