Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i PDK-së, Kadri Veseli, në një reagim të tij ka thënë se postim i Kollçakut “është mentalitet që mendon se përfitimi politik, duke i dëmtuar shqiptarët, jep premisa suksesi në betejën imagjinare politike edhe pas zgjedhjeve”. “Deputetja Kollçaku, në cilësinë e mendimit të saj politik, ka lirinë të propagandojë çfarë të dojë, sado që ajo çfarë ka bërë nuk ishte e mençur. Nuk bëhet fjalë thjesht për një qëndrim, por për një mentalitet që mendon se përfitimi politik, duke i dëmtuar shqiptarët, jep premisa suksesi në betejën imagjinare politike edhe pas zgjedhjeve. Për këtë lloj mentaliteti, Serbia agresive dhe politika e saj perfide, e përmbledhur në imazhin e kreut të saj institucional, Aleksandar Vucic, është më prioritare sesa sfida që na pret – e ardhmja e Kosovës. Nuk ka thirrje taktike për unifikim qëndrimesh pozitë dhe opozitë para Serbisë, vetëm për konsum elektoral të Albin Kurtit dhe damkim me shantazhe. Kjo nuk shitet”, ka shkruar ai fillimisht.
Veseli ka thënë se është i hapur ta takojë Kurtin “për çështje shtetërore”, teksa ka shtuar “Por, nëse vërtet mendon se jam i shantazhuar nga Gjykata Speciale, atëherë Albin Kurti nuk ka nevojë të paktën për mua si një nga themeluesit e UÇK-së”. “Në çdo qëndrim kombëtar që keni proklamuar para fushatës zgjedhore do të jemi me ju. Edhe për flamur kombëtar, edhe për bashkim, edhe për punësim, edhe për konfiskim pasurish për çdo përfitues të paligjshëm. Por, asnjëherë përkulje para presionit, shantazhit e manipulimit”, ka shtuar Veseli.
Sipas Veselit, “deputeten në fjalë e ka futur në konfrontim publik të panevojshëm Albin Kurti”.
Veseli ka thënë se në këtë temë është Gjykata Speciale si çështje më e madhe. Sipas tij, stërzgjatja e procesit të ngritjes së aktakuzave, po krijon hapësirë që nga VV-ja e LDK-ja po “përkthehet si shantazh për çështje të brendshme politike, sidomos në raport me Dialogun”.
“Si ish Kryetar i Kuvendit, e vlerësoj korrektësinë dhe maturinë e deritashme që ajo ka treguar në qëndrimet e veta politike. Kërkimfalja për gabime nuk është diçka tragjike. Por, edhe vazhdimi i mbajtjes së qëndrimeve të njëjta të saj, nuk ma ndryshon vlerësimin për të. Por, ka një çështje tjetër më të madhe në këtë temë. Gjykata Speciale. Ka kohë që ka filluar, me entuziazëm e me ankth. Kazani publik po zien sidomos para supozimeve për ngritje të aktakuzave të Gjykatës Speciale. Nuk është e tepërt të thuhet se, përveç pakënaqësive, janë edhe pritshmëritë që kanë ndërtuar si projeksion me targete të veçanta në këtë luftë politike akterët politikë dhe grupet e interesit. Stërzgjatja e këtij procesi afërsisht për 10 vjet, që nga inicimi i kësaj Gjykate, ndërkohë që epilogu i saj nuk po duket, qartazi po krijon hapësirë që nga LVV dhe LDK të përkthehet si shantazh për çështje të brendshme politike, sidomos në raport me Dialogun. Pra, që vonesat e Gjykatës Speciale të lidhen me marrëveshjen përfundimtare me Serbinë dhe sjelljen e disave prej nesh, varësisht nga ky presion”, ka shtuar ai.
“Qytetarët le të jenë të vëmendshëm për premtimet që ua dhanë qeveritarët e sotëm, edhe në planin kombëtar, edhe në atë të mirëqenies. E sa për pjesën e UÇK-së dhe timen si një prej liderëve të saj, që nga dita e parë, ju siguroj se luftëtarët e lirisë asnjëherë nuk lëvizin nga interesi i Kosovës dhe dinë ta mbrojnë mirë atë deri në fund”, ka thënë në fund ai.
Fatmir Sejdiu: Deklaratën për shpalljen e Pavarësisë 12 vjet më parë, ishte dashur ta lexonte, kryekuvendari, Jakup Krasniqi
Ish kryetari Kosovës, Fatmir Sejdiu ka rrëfyer pse ish-kryeministri Hashim Thaçi, tash president i Kosovës, e lexoi deklaratën e pavarësisë së Kosovë me 17 shkurt të 2008. Sejdiu tregon se deklaratën e pavarësisë së Kosovës nuk e ka punuar dhe nuk është rezultat i vetëm një personi.
Deklarata nuk është një dokument që është shkruar nga vetëm një njeri dhe kush e thotë e flet të pa vërtetën. Është hartuar në një fazë më të hershme dhe këtu kanë rol të madh Shtetet e Bashkuara të Amerikës, në një konsultë ku kanë qenë edhe zotëri Thaçi edhe zotëri Krasniqi dhe me mua ka qenë edhe ministri i jashtëm dhe kemi punuar. Ne më vonë kemi biseduar rreth kësaj. Natyrisht se ka pas ide që ta lexoj unë por ka pas edhe insistime që Thaçi ta marrë. Ai thotë se në aspektin profesional është dashur që deklarata e pavarësisë të lexohet nga Jakup Krasniqi që në atë kohë ishte kryetar i Kuvendit të Kosovës.
