Kryetari i Komunës së Rahovecit Smajl Latifi, sot, në praninë e shumë qytetarëve mbajti takimin e parë publik për punën në gjashtë (6) – mujorin e parë të vitit 2024, takim ky që obligohet nga Ligji për Vetëqeverisje Lokale dhe Udhëzimi Administrativ për Administratë të Hapur në Komuna. Kryetari Latifi paraqiti raportin e punës për 6-mujorin e parë, i cili përmban punën dhe angazhimin e të gjitha zyreve, të cilat funksionojnë në kuadër të Zyrës së Kryetarit, raportet e punës për 6-mujorin e parë 2024 të të gjitha drejtorive komunale, ku spikaten prioritetet, synimet, angazhimet dhe përpjekjet e Komunës së Rahovecit për mbarëvajtjen e proceseve, si dhe zhvillimin e projekteve të rëndësishme për qytetarët. Të pranishmit parashtruan pyetje dhe kërkesa të ndryshme për të cilat morën përgjigje dhe sqarime nga Kryetari Latifi.