Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i komunës së Rahovecit Smajl Latifi, ka pritur në zyrën e tij bashkatdhetarin Agron Berisha. Investimi në arsim është investim i drejtpërdrejtë në të ardhmen më të ndritur të fëmijëve tanë. Nuk janë të paktë njerëzit e vullnetit të mirë në radhët e mërgimtarëve, të cilët mbi të gjitha ia dinë vlerës arsimit dhe ngritjes së cilësisë në arsim. Njëri nga ta, që e ka dëshmuar dhe shprehur me vepra këtë vullnet, është mërgimtari nga fshati Dejnë i komunës së Rahovecit, Agron Berisha, i cili vite me radhë po ndihmon me donacionet e tij të njëpasnjëshme në Shkollën “Rudolf Walther” në Dejnë, shkollat tjera, e gjithashtu edhe QMF-në në Ratkoc me pajisje teknologjike. Agron Berisha ka pajisur fillimisht 10 klasa të shkollës me inventarë(banka e karrige për nxënës) e pastaj në muajin maj të këtij viti ka pajisur Shkollën “Rudolf Walther” në Dejnë dhe Dobidol me pajisje teknologjike në vlerë prej 8500€. Agroni, nuk u ndal me kaq. Para pak ditësh ai erdhi sërish nga mërgimi duke sjellë me vete edhe shumë pajisje të tjera “Smart Televizorë, Laptopë, Videoprojektorë, Printerë, makinë kositëse të barit, etj, për këtë shkollë dhe për Shkollën “Rilindja” në Çifllak. Gjithashtu, ai ka sjellë pajisje edhe për Qendrën e Mjekësisë Familjare në Ratkoc. Kontributi i deritanishëm i mërgimtarit tonë Agron Berisha kap vlerën mbi 30.000 €. Ai edhe sot, në një vizitë që bëri në zyrën e kryetarit të komunës së Rahovecit shprehu vullnetin dhe dëshirën e tij të madhe t’i ndihmojë shkollat tona me pajisje të ndryshme, që janë fjala e fundit e teknologjisë. Agron Berishës Kryetari Latifi i ka nda një mirënjohje në shenjë respekti dhe falënderimi për kontributin e tij të çmuar gjatë gjithë këtyre viteve, e në veçanti gjatë vitit 2022. Agron Berisha, FALEMINDERIT NGA ZEMRA, i ka thënë kryetari Latifi!
