Kryetari Latifi pas marrjes së Vendimit për krijimin e Zonës Ekonomike  mbajti konferencë për media

29/06/2018 Institucionet

Kryetari i Komunës së Rahovecit, Smajl Latifi ka mbajtur konferencë për media pas marrjes së Vendimit për aprovimin e kërkesës nga Qeveria e Republikës së Kosovës, për krijimin e Zonës Ekonomike, zonë kjo që do të krijohet mbi fshatin Opterushë. Të pranishëm në konferencë ishin nënkryetari Fatmir Iska, Afrim Dina Kryesues i Kuvendit, drejtorë të Drejtorive Komunale dhe Musa Cena, zëvendësministër në Ministrinë e Zhvillimit Rajonal. Lidhur me Vendimin e Qeverisë së Kosovës për krijimin e Zonës Ekonomike, Kryetari i Komunës së Rahovecit Smajl Latifi, është shprehur se Vendimi i Qeverisë së Republikës së Kosovës, i datës 22.06.2018, për krijimin e Zonës Ekonomike në komunën e Rahovecit, është ndër vendimet më të rëndësishme për perspektivën ekonomike të kësaj komune. Në këtë mënyrë po përmbushet një kërkesë e kamotshme e bizneseve të Rahovecit për një hapësirë të lirë ku do të zhvillohen veprimtari të ndryshme ekonomike. “Komuna e Rahovecit, si zonë e rëndësishme agrare, është një nga zonat që sjellin përfitime financiare për banorët e zonës dhe për buxhetin e Republikës së Kosovës, prandaj konsiderojmë se, krijimi i një zone të lirë ekonomike është hap i rëndësishëm për ekonominë e vendit tonë në përgjithësi. Investimet në këtë zonë agro-industriale janë të një rëndësie të veçantë, prandaj ju bëjmë thirrje Ministrisë së Tregtisë dhe Industrisë, dhe ministrive të tjera që kanë synim përmirësimin e gjendjes ekonomike e sociale në vend, që të bashkëpunojnë me Komunën e Rahovecit për ndërtimin e infrastrukturës së nevojshme në këtë Zonë Ekonomike dhe ofrimin e hapësirave për bizneset e komunës së Rahovecit e më gjerë. Finalizimi i një synimi 17-vjeçar, përbën arritje të madhe për qytetarët e komunës së Rahovecit, por që dëshmon për qasjen dhe  përkushtimin e Ekzekutivit të Rahovecit dhe të Qeverisë së Republikës së Kosovës për krijimin e hapësirave për punë të qytetarëve të këtij vendi. Komuna e Rahovecit në afat të shkurtër kohor do të hartojë planin e veprimit dhe do të zhvillojë procedurat e nevojshme në mënyrë që Zona të jetë e qasshme për bizneset e interesuara. Në emër të qytetarëve të Rahovecit shpreh mirënjohjen time për Kryeministrin Haradinaj dhe lidershipin e vendosur të tij e të qeverisë që ai drejton për t’i hapë udhë zhvillimit ekonomik të qëndrueshëm të Rahovecit. Po ashtu, dua të falënderoj  edhe z. Besnik Tahiri, koordinator kombëtar për reforma shtetërore për kujdesin, angazhimin, bashkëpunimin si dhe përkushtimin që ai ka treguar që të arrihet qëllimi”, ka thënë ndër të tjera Kryetari Latifi.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara