Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Republikës së Kosovës, Hashim Thaçi përmes një postimi në rrjetin social e ka kujtuar 12 qershorin e vitit 1999 që shënon ditën kur vendi ynë është çliruar nga okupatori serb. Ai ka thënë se para 19 vjetësh Kosova ka hyrë në një epokë të re historike, atë të çlirimit dhe të lirisë, falë rezistencës dhe luftës së UÇK-së, përkrahjes dhe intervenimit të NATO-s.
“Pas një fushate bombardimesh prej 78 ditësh mbi caqet ushtarake dhe policore serbe, si dhe me arritjen e Marrëveshjes së Kumanovës, forcat e aleancës veriatlantike të NATO-s hynë në Kosovë. Para 19 vjetësh Kosova hyri në një epokë të re historike, të çlirimit dhe lirisë, falë rezistencës gjithëqytetare, luftës së Ushtrisë Çlirimtare të Kosovës, përkrahjes së Shteteve të Bashkuara të Amerikës, shteteve të BE-së dhe intervenimit të NATO-s. Largimi i forcave ushtarake të Serbisë, hyrja e trupave të NATO-s, kthimi i popullatës së zhvendosur gjatë luftës shënuan hapat e parë të rindërtimit të Kosovës që për dy vite përjetoi shkatërrime të mëdha materiale, krime, masakra, gjenocid dhe spastrim etnik. Pas një periudhe tranzicioni Kosova ngriti institucione demokratike dhe më 17 shkurt 2008 shpalli pavarësinë, duke arritur objektivin e dytë historik pas çlirimit. Kosova është përjetë mirënjohëse për kontributin e shteteve të botës demokratike që në ditët më të vështira na ofruan përkrahje diplomatike, ushtarake, humanitare dhe materiale, por edhe për mbështetjen e vazhdueshme deri më tani. Kosova sot synon anëtarësimin dhe integrimin në institucione euroatlantike, përfshirë anëtarësimin në të gjitha organizatat e OKB-së, si gjitha shtetet dhe kombet e lira”, ka shkruar Thaçi.
