Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot është 28 Nëntori, Dita e Flamurit, Dita e shpalljes së Pavarësisë së Shqipërisë. Në këtë ditë të madhe historike e cila lidh katër data ndër më të rëndësishmet të popullit shqiptar, si kurdoherë deri tani janë mbajtur manifestime, janë zhvilluar aktivitete kulturore e tematike dhe janë përkujtuar këto ngjarje më me rëndësi të kalendarit tonë kombëtar. Kujtojmë me këtë rast se 108 vjet më parë në Vlorë përfaqësues të katër Vilajeteve shqiptare e shpallën Pavarësinë e Shtetit Shqiptar duke u shkëputur nga Perandoria Osmane. Shpallja e Pavarësisë së Shqipërisë ishte kurorëzim i përpjekjeve shekullore dhe luftërave të pareshtura që bënë shqiptarët për çlirimin e vendit. Po përnjëherë Shqipëria u godit sidomos në aspektin territorial, pasi ushtritë e fqinjëve gjatë Luftërave Ballkanike copëtuan dhe aneksuan shumicën e trojeve shqiptare. Konferenca e Londrës e mbajtur më 1913 i legjitimoi pushtimet e territoreve duke i rrudhur kufijtë e Shqipërisë dhe duke marrë nga ajo dy të tretat e territorit historik dhe etnik.
Sa herë vjen Nëntori, nga viti në vit, shqiptarët liridashës në Shqipëri, Kosovë, në Iliridë, në Kosovën Lindore, në trevat shqiptare të Malit të Zi, në Greqi, në Çamëri, në Turqi, Itali, Ukrainë, Bullgari e kudo në botë, bëhen bashkë për të kujtuar të kaluarën e lavdishme dhe heroike, bëhen bashkë për të përkujtuar dëshmorët, martirët, heronjtë dhe gjithë ata burra e gra që dhanë jetën e tyre për Shqipërinë, e cila as është dhënë e as po jepet, por po qëndron e patundur me besim se ora shqiptare, nuk po i ndalon tik-taket, në rrugë për bashkim të të gjitha pjesëve të atdheut në një shtet të vetëm, në një Shqipëri.
