Lahi Brahimaj: Në çdo pranverë, zemrat tona kthehen në Gllogjan – vatër e heroizmit dhe djep i lirisë

24 marsi i vitit 1998 shkroi me gjak historinë e qëndresës në Gllogjan. Një vit më vonë, sikur fati të donte të vuloste drejtësinë, po në këtë datë, qielli i Kosovës u ndriçua nga avionët e NATO-s. 26 vjet nga ajo ditë e bekuar kur bota e lirë u bashkua me kauzën tonë të drejtë, duke i dhënë fund natës së gjatë të robërisë.

Familja Haradinaj, si gjithmonë në ballë të lirisë, u bë simbol i qëndresës së pathyeshme. Gjaku i dëshmorëve u shndërrua në themelin e fitores së UÇK-së. Pushkët e luftëtarëve të lirisë dhe bombat e NATO-s u bashkuan në simfoninë e lirisë, duke i dhënë fund një periudhe të errët të historisë sonë.

Këtu në Kompleksin Memorial të ZO të Dukagjinit, çdo gur është dëshmitar i sakrificës supreme, çdo pëllëmbë tokë është e bekuar me gjakun e atyre që dhanë gjithçka për ne. Kujtimi i tyre jeton në çdo frymëmarrje të Kosovës së lirë.

Falënderues përgjithmonë për aleatët! Lavdi e përjetshme të rënëve për liri!