Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me agun e hershëm të mëngjesit trishtueshëm mësuam kumtin për shuarjen e jetës së Ahmet Qeriqit, gazetar, shkrimtar, publicist, luftëtar i lirisë, intelektual i përveçëm në Shtime.
Jeta pa profesor Ahmet Qeriqin qenka një detyrim i rëndë, për familjen, miqtë dhe krejt Shtimen e më gjerë.
Të gjithëve ngushllime!
Familjarët, shokët, miqtë dhe bashkëluftëtarët e të ndjerit të përlotur dhe me pikëllim të thellë në shpirt, me nderimet më të larta ushtarake dhe qytetare, pasditën e sotme në varrezat e lagjes Qeriqi në Krojmir e varrosën në tokën me plot plagë të Kosovës, e cila po e shtrëngonte në gjiun e vet të ngrohtë që aq shumë e deshi.
Ishte ndarje kjo tepër e dhembshme për të gjithë ata që patën fatin të njihen, të punojnë a të mësojnë prej tij.
Ahmet Qeriqi (1946) doli nga një derë e fisme, e njohur për bujari e dinjitet kombëtar mbi të gjitha arsimdashës. Lindi në fshatin Krojmir të komunës së Lipjanit. Shkollën fillore dhe të mesme i kreu në Prishtinë, ku më pas mbaroi studimet për gjuhë dhe letërsi shqipe në Fakultetin Filozofik të Universitetit të Prishtinës (1973).
Ka punuar në Gjimnazin e Ferizajt, në Akademinë Pedagogjike dhe në Shkollën e Mesme Teknike në Prishtinë. Ishte pjesëmarrës i lëvizjes ilegale dhe disa herë ka qenë i dënuar për veprimtari politike. Ka marrë pjesë aktive në luftën e lavdishme të Ushtrisë Çlirimtare të Kosovës dhe ishte njëri ndër themeluesit dhe drejtuesit e Radio “Kosova e Lirë”.
Në periudhën e pasluftës ishte drejtor i kësaj radioje. Ka botuar një sërë veprash letrare dhe publicistike, si romanet: “Meditime në arrati” (2000), “Burgu” (2004), “Koha e jeniçerëve” (2009) etj., si dhe veprat studimore dhe monografitë: “Fenomene shqiptare” (2005), “Gjurmime dhe studime” (2011), “Luftëtarë të NDSH” I, II etj.
Ndarja nga jeta e Ahmet Qeriqit paraqet një humbje për Radion “Kosova e Lirë”, TV “Dielli”-in, për familjen dhe miqtë që e deshën dhe i deshti aq shumë.
Unë pata fatin ta kem redaktor dhe bashkautor të librit “Masakra e Reçakut krim kundër njerëzimit” (2004). Mësova shumë prej profesor Ahmet Qeriqit.
Do ti mungoj shumë familjes dhe gjithë të tjerëve që e njohën dhe punuan me te.
Ngushllime familjes së gjerë Qeriqi në Shtime e Krojmir, ngushllime bashkëpunëtorëve me të cilët punoi dhe jetoi për ta.
Profesor Qeriqi do të jetojë përherë i gjallë në kujtimet tona.
Le të jenë si një tufë lulesh të njoma lotët që u derdhën sot për të.
Prehu në paqe të përmotshme profesor i dashur Ahmet Qeriqi.
I përjetshëm qoftë kujtimi dhe respekti për ty!
