Malisheva po shënon manifestimin “Epopeja e UÇK-së”

06/03/2017 Institucionet

Në kuadër të shënimit të manifestimit  “Epopeja e UÇK-së”, Komuna e Malishevës, përmes aktiviteteve të ndryshme, po shënon këto data me rëndësi në historinë e popullit shqiptar. Në kuadër të këtyre shënimeve, Kuvendi i Komunës së Malishevës, ka mbajtur një seancë solemne, ndërsa janë bërë nderime pranë shtatores së Komandantit Legjendar Adem Jashari në Malishevë, homazhe në varrezat e dëshmorëve në Malishevë, Kleçkë dhe në Prekaz.

Në seancën solemne, të Kuvendit të Komunës, krahas anëtarëve të Kuvendit të Komunës dhe familjeve të dëshmorëve, morën pjesë edhe Kryetari i Komunës së Malishevës, Ragip Begaj, deputeti i Kuvendit të Kosovës, Enver Hoti, komandanti i stacionit policor në Malishevë, Halil Morina, përfaqësues të shoqatave të dala nga lufta, dhe të tjerë.

“Ngjarja e 5, 6 dhe 7 Marsit, të vitit 1998, ishte dhe do të mbetet njëra prej ngjarjeve më të rëndësishme në historinë e popullit shqiptar, sepse pas kësaj ngjarje u bë kthesa e madhe historike”, tha kryetari Begaj, ne fjalën e tij, ndërsa duke folur për sakrificën e familjes Jashari, Begaj tha se “Kjo sakrificë e një familjeje, është rasti më unik në botë, i një sakrifice të një familjeje, të cilët ranë për çështjen kombëtare”. Në fjalën e tij, kryetari Begaj, e përmendi edhe ish kryeministrin e vendit Ramush Haradinaj dhe luftëtarët tjerë të lirisë, të cilët, po mbahen padrejtësisht në burgje.

Ndërsa një fjalë rasti e ka mbajtur edhe kryesuesi i KK të Malishevës, Aziz Thaçi, i cili foli për sakrificën e familjes Jashari, rëndësinë e kësaj ngjarje dhe ndikimi i saj në rrjedhat e mëtutjeshme të historisë. “Sakrifica e familjes Jashari, ishte një histori në vete, e cila i fliste popullit shqiptar dhe botës demokratike, se populli shqiptar e ka nisur shtegtimin e tij për liri, të cilën nuk mund ta ndalë askush”, tha mes tjerash kryesuesi Thaçi, i cili shprehi mirënjohje edhe për të gjithë dëshmorët e kombit dhe të gjithë mësuesit e rënë në luftën për liri.

Një fjalë rasti e ka mbajtur edhe deputeti i Kuvendit të Kosovës, Enver Hoti, i cili tha se “sot është një datë, kur të gjithë duhet të jemi të bashkuar, pa marrë parasysh bindjet. Sot jemi para një sfide të madhe, kur vendi ynë po përballet me rreziqe te vazhdueshme, përfshi edhe integritetin territorial dhe kushtetutshmërinë, dhe këto janë sfida të cilat duhet të na mbajnë të bashkuar”.

Fjalë rasti ka mbajtur edhe përfaqësuesi i familjeve të dëshmorëve në Malishevës, Sinan Gegaj.

Më pas, janë bërë nderime para shtatores së Komandantit Legjendar Adem Jashari, në sheshin e dëshmorëve në Malishevë, homazhe në varrezat në Malishevë dhe Kleçkë, si dhe në Prekaz, ndërsa është bërë një vizitë edhe në odën e madhe të Jasharajve në Prekaz.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara