Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me 83 vota pro, 10 kundër dhe 10 abstenim, Kuvendi i Shqipërisë ka miratuar kërkesën për ngritjen e Komisionit të posaçëm për raportin e Dick Marty, i cili implikonte UÇK-në. Ky komision ka nisur me iniciativën e kryetarit të grupit parlamentar të Partisë Socialiste, Taulant Balla, ku më pas është depozituar kërkesa për ngritjen e një komisioni të posaçëm që do të marrë në shqyrtim të gjitha pretendimet e ngritura më rezolutën e Këshillit të Evropës, prej senatorit Dick Marty. Me këtë rast, Balla nga foltorja e Kuvendit ka folur për ngritjen e Komisionit të posaçëm, i cili do të hetojë akuzat e raportit të Dick Marty, sipas të cilit në Shqipëri janë kryer krime lufte dhe krime kundër njerëzimit, në kuadër të luftës së UÇK-së në Kosovë. Në kërkesën drejtuar Kuvendit të Shqipërisë firmosur nga 18 deputetë socialistë është thënë se: “Ngritja e një Komisioni të posaçëm të Kuvendit të Shqipërisë për administrimin e dokumentacionit dhe hartimin e një raporti përmbledhës dhe informues mbi gjetjet dhe konkluzionet që kanë nxjerrë verifikimet e kryera nga institucionet përkatës në Shqipëri mbi çështjen e raportit të anëtarit APKiE, Dick Marty, mbi bashkëpunimin dhe rolin për të cilin pretendohet se kanë luajtur përfaqësues politik shqiptarë ose institucione publike shqiptare, nëpërmjet veprimeve dhe mosveprimeve, në ndihmë të së ashtuquajturës veprimtari kriminale e drejtuesve të UÇK-së në Shqipëri”.
Ky komision duhet të hartojë një raport të detajuar përmbledhës dhe informues për të gjitha këto çështje dhe t’ia prezantojë Kuvendit të Shqipërisë brenda tre muajve. Po ashtu, komisionit në fjalë duhet t’i vihen në dispozicion dokumentacioni i plotë që disponon institucionet publike, sipas legjislacionit në fuqi lidhur me dokumentacionin zyrtar dhe atë të klasifikuar. Komisioni i posaçëm duhet që në përfundim të punës sipas objektit dhe raportit të miratuar përmbledhës të hartojë një projekt rezolutë të Kuvendit të Shqipërisë për çështjet.
