Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
– “ Edhe tri jetë po t’i kisha, të tria do t’i falja për Shqipërinë!”…
Janë këto orë të liga për Kosovën dhe shqiptarinë në përgjithësi, miq e shokë, bashkëvuajtës e bashkëluftëtarë të lirisë, njerëz të penës e urtësisë, të kuvendit dhe të vendimeve me peshë:
Koha po kërkon vendosmërinë tonë për të mbrojtur lirinë dhe sovranitetin tonë kombëtar, prandaj çdo interes tjetër që eventualisht mund të vihet mbi interesat e shtetit, është i paqëndrueshëm i dënueshëm dhe i pafalshëm.
Mos u merrni me emra të përveçëm, cilët do qofshin ata, në këtë kohë kur duhet të jemi më unik së kurrë. Në fakt edhe sot, dikush po krihet, luteni mos u krihni kur fshati po digjet, madje as pas emrave të përveçëm. Veç e veç si emra, qofshin ata edhe më fuqi mbinatyrore, nuk vlejnë më shumë së një lakimi i tyre nëpër rasa, prandaj mos u krihni, mos!
Ne si gjithmonë, ashtu siç edhe na mëson historia jonë e përgjakur; vetëm të bashkuar ia kemi dalë, por jo edhe të shkapërderdhë e shpërndarë, për më keq, sot, njeri-tjetrin, duke fyer e sharë deri në banalitet e pa përmbatshmëri!
E padiskutueshme, shpjeguar edhe ndryshe, Sylejman Vokshin, një ditë të caktuar, vdekja e natyrshme do ta merrte me vete, por ai sot jeton i përjetësuar derdhur në bronz, me dhjetëra rrugë e institucione mbajnë me krenari emrin dhe figurën e tij, pse?!, për të vetmen arsye: Burrat e dheut të asaj kohe, në mesin e tyre edhe Sylajmani, nuk shanin njëri-tjetrin por shanin pushtuesin; ai para së ta varnin tha:
– “ Edhe tri jetë po t’i kisha, të tria do t’i falja për Shqipërinë!”…
Sylejmani dhe çlirimtarë të panumërt me vendosmërinë e tyre në shërbim të atdheut, duke mbrojtur interesat kombëtare në rend të parë, dhe njëri-tjetrin më pastaj, si liridashës të vërtetë sot e mot, mbeten krenaria jonë kombëtare në krahasim me ata që tradhtuan, që shanë atdheun dhe të devotshmit e kombit tonë, që shanë e fyen njëri-tjetrin- sot e mot, mbeten turpi ynë!
Pra ka dy rrugë: i përjetësuar në bronz dhe i përjetësuar në turp!
As kush nga ne, nuk dëshiron të përfundojë si njollë turpi e kombit, si tradhtarë i interesave të atdheut, si emër që përjetësisht do të lakohet në vorbullën e turpit… jo, prandaj duhet të kemi shumë kujdes- në veçanti kur është në pyetje fati i atdheut- vetëm të bashkuar. Mos u krihni kur shtëpia digjet, mos u merrni me emra të përveçëm se kjo nuk na shpie askund.
Sot më shumë se kurrë- kërkohet vigjilencë, diplomaci dhe vendosmëri për të dërguar aspiratat kombëtare në vend. Çdo mëdyshje rreth këtyre interesave do të jetë e dënueshëm dhe e papranueshme për popullin dhe kombin tonë.
CH-20-02-2025
