Ministri i jashtëm hungarez, Peter Szijjarto, reagoi me shpërfillje ndaj vendimit të përfaqësuesit të lartë evropian, Josep Borrell, për ta ndryshuar vendin e takimit të ministrave të jashtëm të Bashkimit Evropian nga Budapesti në Bruksel, në shenjë proteste ndaj sjelljes së Hungarisë gjatë kryesimit të presidencës së BE-së. Josep Borrell e ndryshoi vendin e takimit pasi kryeministri hungarez, Viktor Orban, ndërmori një mision paqeje për Ukrainën pa u bashkërenduar me udhëheqësit e tjerë të BE-së apo me Ukrainën. Ky veprim u pasua nga takimet e tij me Presidentin rus, Vladimir Putin, dhe kandidatin republikan për president të SHBA-së, Donald Trump. Borrell tha se ndryshimi i vendit të takimit nga Budapesti në Bruksel kishte për qëllim të dërgonte një sinjal simbolik ndaj Hungarisë, për shkak të kontakteve të Orbanit me Rusinë, e cila është nën sanksione të BE-së për agresionin ndaj Ukrainës.
![](https://www.radiokosovaelire.com/wp-content/uploads/Peter-Szijjarto-3-660x330.jpg)