Ministrja Dumoshi uron rektorin Dema për 50-vjetorin e UP-së

15/02/2020 Institucionet

Ministrja e Kulturës, Rinisë dhe Sportit, Vlora Dumoshi, ka vizituar rektoratin e Universitetit të Prishtinës “Hasan Prishtina” me rastin e 50 vjetorit të themelimit të Universitetit të Prishtinës. Ajo u mirëprit nga rektori i UP-së, Marjan Dema dhe nga përfaqësues të stafit akademik. Ministrja Dumoshi e rektori Dema diskutuan për bashkëpunimin mes të dyja institucioneve në projekte të përbashkëta. Me rastin e kësaj vizite, Ministrja Dumoshi ka uruar rektorin Dema për 50 vjetorin e themelimit të UP-së. Ndër të tjera, ministrja tha se të gjithë e kujtojmë me nderim dhe respekt kontributin e të gjithë atyre që çuan në themelimin e vatrës kryesore të dijes para 50 viteve që njëherësh ishte dhe ka mbetur shtylla kryesore e zhvillimit të Republikës së Kosovës. Për më tepër më poshtë gjeni urimin e Ministres Dumoshi.

I dashuri Rektor Demaj,

Të dashur profesorë dhe profesoresha të nderuara të Universitetit të Prishtinës,

Të dashur studentë!

Themelimi i Universitetit të Prishtinës është ngjarje madhore në historinë e kulturës shqiptare. Prandaj, ju uroj nga zemra 50 vjetorin, duke shprehur respektin dhe konsideratën time më të thellë për punën e vyeshme që bëni për të ngritur edhe më lart dijen, shkencën dhe kulturën e vendit tonë. Me këtë rast, kujtojmë me nderim dhe respekt të gjitha përpjekjet që çuan në themelimin e këtij Universiteti, veçmas kontributin e madh që kanë dhënë demonstratat e vitit 1968 dhe plejada e patriotëve shqiptarë që sakrifikuan çdo gjë për përparimin tonë kombëtar. Po ashtu, me respekt të thellë, duhet të kujtojmë themeluesit e Universitetit, rektorët dhe profesorët si Dervish Rozhaja, Gazmend Zajmi, Idriz Ajeti, Mark Krasniqi, Hajredin Hoxha, Fehmi Agani, Syrja Pupovci, Ali Hadri, Hasan Mekuli e Muslim Mulliqi dhe një plejadë e tërë intelektualësh dhe patriotësh të vyer, që u bënë pishtarë të dijes dhe të kulturës. Pa dyshim, rol të pazëvendësueshëm në të gjitha përpjekjet tona kombëtare kanë dhënë studentët e këtij Universiteti, të cilët krahas studimeve, janë përfshirë edhe në zhvillime politike, duke u dhënë atyre shtytje dhe dinamikë të veçantë. Universiteti i Prishtinës, prej themelimit u bë shtylla themelore e zhvillimit të vendit tonë Kosovës, duke luajtur rol fondamental në emancipimin dhe ngritjen politike e kulturore. Kurse gjatë viteve të rënda të shtypjes serbe, ky Universitet, me profesorë dhe studentë, u bë gardian i lirisë, demokracisë dhe pavarësisë. Prandaj, si Ministre e Kulturës, u jam pafundësisht mirënjohëse, juve dhe të gjithë paraardhësve tuaj. Po ashtu, shpreh vullnetin dhe dëshirën time që të punojmë bashkë, në dobi të vendit dhe të kulturës së vendit tonë.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara