Në 20 vjetorin e rënies kujtohet dëshmori Cen Dugolli

17/08/2018 Institucionet

Me homazhe tek Varrezat e Dëshmorëve në Ferizaj, ka filluar ceremonia e përkujtimit të dëshmorit Cen Dugolli, për të vazhduar tutje me një akademi përkujtimore që u mbajt në teatrin e qytetit “Adriana Abdullahu”. Në këtë akademi përkujtimore merrnin pjesë familjarë të dëshmorit, struktura udhëheqëse komunale dhe qendrore si dhe mysafirë të shumtë. Të pranishmit fillimisht i ka përshëndetur Kryetari i Shoqatës së Familjeve të Dëshmorëve Xhavit Jashari, i cili ka vlerësuar tejet lartë kontributin e dëshmorit Cen Dugolli, si dhe të gjithë dëshmoreve të cilët ranë për të mos vdekur kurrë në altarin e lirisë. Ndërsa në emër të Kryetarit të Komunës së Ferizajt, Agim Aliu, të pranishmit i ka përshëndetur Kryesuesja e Kuvendit të Komunës së Ferizajt, Kristina Gashi-Bytyqi. Ajo me këtë rast ka thënë se duke kujtuar jetën dhe veprën e dëshmorit Cen Dugolli, nuk mund të mos kthehemi për disa çaste në kohët tragjike të para 20 viteve, kur vendi ynë po vlonte në katrahurën e vrasjeve, përndjekjeve dhe dëbimeve masive që po u bënte shqiptarëve të Kosovës regjimi i Milosheviqit. “Nuk mund të mos e kujtojmë edhe Dëshmorin e Kombit Cen Dugollin, veprimtarin e parë të rezistencës i cili u vra nga forcat serbe me 17 gusht të vitit 1998. Ai vdiq nga torturat e shumta që i bënë policët serb, por asnjëherë nuk u dorëzua e nuk e tregoj veprimtarinë çlirimtare që po përgatisin shokët në ilegalitet. Sot, në kohën e zhvillimit të përshpejtuar të demokracisë dhe të të drejtave të njeriut, nuk është lehtë të merret me mend se vetëm para 19 vitesh, këtu, në vendin tonë të shumëvuajtur, njerëzit janë keqtrajtuar deri në vdekje, janë vrarë e masakruar, vetëm për shkak të përkatësisë kombëtare dhe veprimtarisë atdhetare. Kjo gjë madje mund t’u tingëllojë si diçka e pamundur fëmijëve dhe të rinjve të lindur pas vitit 1999. Këta fëmijë dhe të rinj e kanë të vështirë ta kuptojnë se përse duhej të vdisnin kaq shumë njerëz, përse duhej t’u nënshtrohej vuajtjeve të pafund një popull i tërë, derisa jetonte në vendin dhe në tokën e vet. Këtë absurd e kishte kuptuar shumë mirë Cena dhe qindra e mijëra atdhetarë të tjerë, ndaj iu kundërvunë me të gjitha mundësitë, deri në flijim. Dhe falë flijimeve të panumërta, si dhe mbështetjes së fuqishme ndërkombëtare, e kemi kapërcyer atë kohë të rëndë, ndonëse me një çmim shumë të lartë”, ka thënë Gashi-Bytyqi. Në emër të familjes Dugolli, të pranishmit i ka përshëndetur i biri i dëshmorit Tafil Dugolli. Ai ka falënderuar të gjithë të pranishmit që nderuan jetën dhe veprën e babit të tij, por ka kërkuar një përkrahje me të madhe edhe nga institucionet. Dëshmori Cen Dugolli, la pas vetën bashkëshorten dhe katër fëmijët e tij.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara