Në Drenoc të Rahovecit, është përkujtuar 26 Prilli i vitit 1998

26/04/2021 Institucionet

Në Drenoc të komunës së Rahovecit, është përkujtuar 26 Prilli 1998, Dita e daljes publike të UÇK-së, e cila më pas u përhap si rrufeja në gjithë Anadrininë dhe Zonën Operative të Pashtrikut. I pranishëm në këtë datë të rëndësishme ishin kryetari i komunës së Rahovecit, Smajl Latifi me bashkëpunëtor, bashkëluftëtarët dhe familjarët të dëshmorëve. “Edhe pas 23 vjetësh kujtojmë me pietet të lartë heronjtë: Mensur Zyberajn, vëllezërit heronj Feim dhe Bedrush Gashin, të gjithë luftëtarët që ranë dëshmorë nëpër beteja, nga Drenoci e gjithë Anadrinia, po ashtu, luftëtarët e gjallë që ishin pjesë e kësaj ngjarjeje të veçantë historike, veteranë invalidë që u plagosën në përballje me armiqtë. Lëvizjet e ilegalëve ishin aktive në këtë zonë, e ato, nuk shihnin rrugë tjetër për çlirimin e Kosovës, përveç asaj të luftës së armatosur. Armiku i egër e gjakatar vëzhgonte dhe ndëshkonte rëndë ata që guxonin ta sfidonin pushtimin. Shfaqja e grupeve të armatosura e kishte alarmuar dhe mobilizuar pushtuesin serb, prandaj edhe synoi të godasë mu në qendër të këtij organizimi, për të kapur në befasi celulën e parë të UÇK-së në Drenoc. Jo vetëm që dështuan, por këto ngjarje ndikuan në mobilizimin e shpejtë të krejt rajonit të Anadrinisë. Kjo bërthamë çlirimtarësh do të jetë fara e hedhur e lirisë e që do të mbijë vrullshëm në tërë atë, që do të quhet Zona Operative e Pashtrikut. Vlerësimi dhe mirënjohja për luftën çlirimtare, për luftëtarët, heronjtë, dëshmorët dhe gjithë të rënët për liri, është nderë dhe detyrë e secilit prej nesh. Lufta e UÇK-së, përveçse është e drejtë dhe e pastër, ajo është vlerë e jona e paprekshme kombëtare dhe historike. UÇK-ja është simbol i lirisë së fituar me përpjekje heroike të pjesëtarëve të saj. Liria erdhi pas betejash e flijimesh të mëdha, erdhi e u mishërua me dhimbjen dhe krenarinë që na dhuruan të rënët e të gjallët tanë që u përballën me Serbinë pushtuese dhe aparatin e saj shtetëror, e cila ndaj shqiptarëve kishte vënë në zbatim: gjenocidin dhe krimet më të tmerrshme, shfarosjen dhe përzënien e shqiptarëve nga trojet e veta”,- ka thënë me këtë rast Kryetari Latifi.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara