Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Delegacioni i Komisionit për Çështje Evropiane i Kuvendit të Republikës së Maqedonisë së Veriut, i përbërë nga Arbër Ademi, kryetar, Fanica Nikollovska, anëtare dhe zëvendësanëtarë Beti Rabaxhievska Naumovska,Abdulla Saliu dhe Igor Zdravkovski, morën pjesë në takimin e përbashkët ndërparlamentar të komisioneve për çështje evropiane dhe punë të jashtme të parlamenteve të Shqipërisë, Bosnjë dhe Hercegovinës, Bullgarisë, Maqedonisë së Veriut, Kosovës dhe Kroacisë, që u mbajt në Kuvendin e Kosovës.
Në forumin, të cilin e hapi znj. Arbëresha Kryeziu-Hiseni, kryetare e Komisionit për Punë të Jashtme dhe Diasporë, fjalë përshëndetëse mbajtën znj. Saranda Bogujevci, nënkryetare e parë e Kuvendit të Kosovës, si dhe z. Besnik Bislimi, zëvendëskryeministër i parë për eurointegrime, zhvillim dhe dialog dhe znj. Donika Gërvalla Shvarc, zëvendëskryeministre e dytë dhe ministre e Punëve të Jashtme dhe Diasporës në Qeverinë e Republikës së Kosovës. Në prezantimet e tyre u theksua se ky forum është platformë strategjike për dialog thelbësor për rrugën tonë të përbashkët drejt eurointegrimit dhe në drejtim të bashkëpunimit reciprok dhe mbështetjes dhe shkëmbimit të përvojave dhe praktikave pozitive.
Ademi në fjalimin e tij në seancën kushtuar Lëvizjes në procesin e eurointegrimeve: sfidat, mundësitë dhe strategjitë për bashkëpunim, përshëndeti nismën për bashkimin rajonal dhe shkëmbimin e përvojave dhe praktikave në lidhje me proceset eurointegruese, që do të kontribuojë në rezultate pozitive në drejtim të avancimit të tyre dhe arritjes së qëllimit të përbashkët përfundimtar, që është anëtarësim në BE. Në të njëjtën kohë, theksoi se Maqedonia e Veriut në vazhdimësi ruan trend pozitiv të bashkëpunimit dhe komunikimit intensiv bilateral në nivelin më të lartë me të gjitha vendet e BP-së. Interesi ynë strategjik është në drejtim të ndërtimit, pasurimit dhe ruajtjes së marrëdhënieve të mira fqinjësore të qëndrueshme dhe të begata bilaterale, në të gjitha sferat e interesit dhe në këtë drejtim, tejkalimi i çështjeve të hapura.
Ademi theksoi se duhet shfrytëzuar momenti pozitiv në BE për procesin e zgjerimit, i cili në fakt është duke u përshpejtuar për shkak të rrethanave gjeopolitike dhe se Maqedonia e Veriut nuk duhet të mbetet prapa në rrugën e saj drejt BE-së, për shkak të kushtit të vendosur për ne në Kornizën Negociuese, dhe ky është ndryshimi i Kushtetutës së vendit, me qëllim përfshirjen e bashkësisë bullgare në Kushtetutë. Shpresoi se procedura e nisur do të përfundojë me sukses dhe vendi do të fillojë negociatat dhe do ta hap klasterin “Themelet”.
Në diskutime, bashkëbiseduesit shkëmbyen mendimet dhe qëndrimet e tyre për përvojat e deritanishme në lidhje me proceset eurointegruese, ndërsa theksoi se procesi i BE-së duhet të ketë parashikueshmëri që të jetë i suksesshëm. I përbashkët ishte konstatimi se rajoni nuk ka alternativë tjetër dhe se vendet e BP-së e shohin të ardhmen e tyre në Bashkimin Evropian. Për këtë, u shpreh gatishmëria e vendeve për të përmbushur reformat evropiane, harmonizimi i legjislacioni nacional me atë evropian, sipas kritereve të Kopenhagës dhe tejkalimi i instrumentit të vetos për bllokim të procesit të BE-së, për shkak të çështjeve bilaterale.
