Në Ratkoc, u përkujtua heroi NASER KRASNIQI

04/06/2021 Institucionet

Kryetari i komunës së Rahovecit Smajl Latifi, me bashkëpunëtorë, familjarë dhe përfaqësues të OVL-UÇK-së, kanë përkujtuar 23-vjetorin e rënies në fushë të nderit të njërit prej prijatarëve të luftës në rajonin e Anadrinisë, Naser Krasniqi.

Ky përvjetor i rënies së tij është edhe një dëshmi e epokës së luftës dhe qëndresës tonë kolektive kundër poshtërimit e përbuzjes. Kryetari Latifi tha se, Heroin e kombit, Naser Krasniqi, deri në aktin e rënies, do ta shohim kudo nëpër aksione e fushëbeteja luftarake, si në Drenoc, Bratotin, Ratkoc, Zatriq, Vrajakë, Dejnë, Malësi e Vogël, Gradish, etj., ai, nuk iu frikësua vdekjes dhe nuk i bëri lak asaj. Naser Krasniqi, duke qenë në krye të detyrës, si çdoherë, në mbrëmjen e 4 qershorit 1998 kur filloi një ofensivë e madhe altilerike serbe e kombinuar me shumë forma lufte, pikërisht aty edhe ku lindi, në Ratkoc, në përballje me forcat serbe, bie heroikisht, duke mbrojtur dinjitetin kombëtar dhe lirinë e atdheut. Lufta për çlirim është një ndër aktet më madhore të një populli, prandaj të gjithë ata që u rreshtuan drejtë dhe që i bënë rezistencë armikut, duhet të ndjehen krenar. Ndër këta djem ishte edhe Naseri ynë, trim dhe zemërzjarr për Kosovën. Rrugëtoi me dinjitet e pa u tundur, për një periudhë si një veprimtar i dalluar i LKÇK-së, i shërbeu besnikërisht deri në frymën e fundit luftës tonë çlirimtare, si një luftëtar i sprovuar i UÇK-së. Padyshim, liria e Kosovës mban vulën e gjakut dhe sakrificave të luftëtarëve tanë trima. Si shokë të idealit të përbashkët, ëndërruam të nesërmen ku shqiptarët do të jenë të lirë, sovran dhe zotë të këtij trualli. Hyrja në përjetësi është akti më madhor për një luftëtar lirie, prandaj Naseri mund të konsiderohet si hero i vërtetë dhe njeri që nuk bëri kompromise me lirinë e atdheut. Do të mbahet mend e nderohet për sakrificën e vetëdijshme, duke u bërë simbol i luftës dhe i qëndresës tonë kolektive. Figura e tij do të shkëlqejë në vargun e dëshmorëve të tjerë të kombit që i bënë nder vetes, familjes e atdheut dhe që mbeten përherë në kujtesën tonë. Andaj, sot të gjithë bashkë, kudo që jemi, kemi detyrim të punojmë çdo ditë për ta jetësuar idealin e dëshmorëve të kombit. Përjetësisht nderime dhe lavdi heroit, NASER VELI KRASNIQIT! Lavdi të gjithë dëshmorëve të atdheut! tha me këtë rast kryetari Latifi.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara