Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ende pa zbardhur drita kam dëgjuar trokitje të lehtë në dritare. Bashkëshortja ime, Zymrytja më thotë se është Jetë Hasani. Dal me shpejtësi dhe frikë mos ka ndodhur diçka e papritur. E shoh të qeshur por edhe të lodhur tejmase. Ai më bën me dije se aksioni pjesërisht ka pasur sukses, ndërsa tregon se me rastin e kundërsulmit të policëve shqipfolës kanë marrë plagë tre luftëtarë nga radhët tona, njëri rëndë. Kam qenë fare i sigurt se shtëpia e policëve, në Godanc ruhet me forca të shumta policore. Jeta, dyshon se policët kanë ditur për sulmin. Ai dyshon madje edhe në njërin nga ushtarët tanë që ka marrë pjesë në rrethim.
Sulmi që ka zgjatur afër një orë si duket nuk ka qenë i koordinuar dhe luftëtarët tanë sapo kanë dëgjuar britmat e fëmijëve dhe të grave janë kursyer nga depërtimi brenda shtëpisë. Jeta thotë se ka policë të plagosur ndërsa është fare i sigurt se gratë dhe fëmijët nuk kanë pësuar.
Jetën, pavarësisht nga krejt çka ndodhur e kam mbështetur dhe jam bërë gati për të depërtuar në ambulancë, me qëllim që të shoh gjendjen e ushtarëve të plagosur.
Më vonë kam mësuar se plagë më të forta ka marrë ushtari i quajtur Gjeografi, Nazim Bllaca, pastaj A. Sh. dhe R. M.
Në ambulancë e kam takuar Elez Durmishin dhe mjekun Fitim Selimi i cili gjendjen e të plagosurve e kualifikon jashtë rrezikut. Plagë jo serioze në këmbë ka marrë edhe G. D. Ushtari i plagosur më rëndë, Gjeografi, tregohet shumë i fortë edhe pse shihet se ka temperaturë dhe dhembje.
Askush tani për tani nuk di të tregojë se a ka pasur të vrarë apo të plagosur nga radhët e bashkëpunëtorëve të okupatorit, por trimëron fakti se sulmi i organizuar kundër tyre tregon se Ushtria çlirimtare nuk është shthurur, sikur lajmërojnë mediat serbe.
Në mbrëmje jemi takuar në shtëpinë e Ramizit. Tani kur aksioni nuk ka pasur gjithaq sukses, ai është në formë për të akuzuar dhe për t`u treguar më i përmbajtur, edhe pse e vërteta është krejt ndryshe. Ai është më i papërmbajtur se shumë të tjerë. Kanë ardhur edhe Naim Imeri dhe Vehbi Zeqiri, të cilët po ashtu kanë dëgjuar për sulmin dhe kanë ardhur për të mësuar nga afër se ç’ ka ndodhur.
……
