Pas rivitalizimit të urës, nis rindërtimi i Xhamisë së Ibrit

21/07/2016 Institucionet

Kryetari i Komunës së Mitrtovicës, Agim Bahtiri, ka pritur në një takim anëtarët e Grupit punues të Qeverisë së Kosovës për bisedimet me Qeverinë e Serbisë në Bruksel, Edita Tahiri, ministre pa portofol, Arben Çitaku, sekretar i përhershëm i Ministrisë së Mjedisit dhe Planifikimit Hapësinor dhe Rashid Çalaj, drejtor i Operativës në Policinë e Kosovës, me të cilët ka biseduar për situatën e sigurisë në qytetin e Mitrovicës, me theks të posaçëm në rivitalizimin e urës kryesore mbi lumin Ibër, kufijtë administrativ midis dy komunave të Mitrovicës dhe rindërtimin e Xhamisë së Ibrit, në cepin verior të urës kryesore mbi këtë lum.

Pasi që dëgjoi vlerësimin nga kryetari Bahtiri se situata e sigurisë në komunën e Mitrovicës është e qetë dhe pa probleme të theksuara dhe se tani ajo paraqitet më e mirë se në komunat tjera të Kosovës, pasi që ka rënie të vazhdueshme të veprave kriminale, Ministrja Tahiri tha se është e kënaqur me këtë që po dëgjon dhe e përgëzoi kryetarin Bahtiri për punën që ka bërë në këtë drejtim, bashkë me institucionet përkatëse komunale dhe ato në nivel vendi.

Ministrja Tahiri tha se sa i përket realizimit të projektit për rivitalizimin e urës kryesore mbi Ibër, ka sinjale të mira nga Brukseli se ky premtim do të nis së realizuara gjatë ditëve të ardhshme.

“Meqë Marrëveshja për rivitalizmin e urës është një marrëveshje trepalëshe, pra në mes të BE-së autoriteteve të Republikës së Kosovës dhe Republikës së Serbisë, realizimi i saj kërkon përkushtimin dhe angazhimin e sinqertë të të gjitha palëve. Deri tash Serbia ka qenë bllokuese e aktiviteteve në këtë drejtim, por unë shpresoj se kjo çështje do të zgjidhet dhe pres lajme të mira nga Brukseli”, tha ajo.

Në vazhdim Ministrja Tahiri tha se çështja e rivitalizimit të urës mbi lumin Ibër dhe çështja e përcaktimit të kufijve administrativ midis dy komunave, kësaj në pjesën jugore dhe asaj në pjesën veriore, nuk duhet të ndërlidhen, sepse ato janë dy çështje të ndara.

“Fatmirësisht, ne bashkë me kryetarin Bahtiri kemi arritur që ndërkombëtarët të binden në këtë dhe ata  e kanë bërë të qartë qëndrimin e tyre, se kufijtë ndërmjet dy komunave janë përcaktuar me pakon e Presidentit Ahtisari, andaj edhe rreth kësaj çështje nuk do të ketë më bisedime”, theksoj ajo.

Lidhur me kërkesën e Bashkësisë Islame për rindërtimin e Xhamisë së Ibrit në cepin verior të urës, ministrja Tahiri tha se kjo është një e drejtë që nuk mund ta mohoj askush, prandaj edhe është e bindur se shumë shpejtë do të vije koha kur edhe do të filloj rindërtimi i saj.

Mirëpo, shtoi ajo, në këtë moment ne duhet të jemi të fokusuar së pari për realizimin e marrëveshjes për rivitalizimin e urës, në mënyrë që ajo të hapet sa më shpejt për lëvizje të lirë të të gjithë qytetarëve dhe në të dyja drejtimet, gjë që do të lehtësonte pastaj edhe procesin e rindërtimit të xhamisë aty ku ka qenë.

Pas diskutimeve të gjata lidhur me këtë çështje, ku në ndërkohë u përfshi edhe kryeimami i Bashkësisë Islame të Mitrovicës, Mulla Asllan Murati, të pranishmit u pajtuan që  përpjekjet për rindërtimin e xhamisë të fillojnë pasi që të realizohet marrëveshja për rivitalizimin e urës kryesore mbi lumin Ibër dhe pasi që ajo të lëshohet për lëvizje e qarkullim të lirë të qytetarëve dhe automjeteve.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara