Plani Zhvillimor i Rrjetit të Shpërndarjes konform marrëveshjes dhe nevojave të qytetarëve

18/05/2016 Institucionet

Ministri i Zhvillimit Ekonomik, Blerand Stavileci ka vlerësuar zhvillimet pozitive që ka pasur sektori i distribuimit dhe furnizimit me energji elektrike pas privatizimit të KEDS, që ka rezultuar me përmirësim të inkasimit dhe uljes së humbjeve.

Këto komente ministri Stavileci i bëri me rastin e prezantimit të Planit Zhvillimor të Rrjetit të Shpërndarjes në Kosovë deri në vitin 2025 nga ana e KEDS, ku morën pjesë akterë të sektorit të energjisë dhe kryetarë të komunave të Kosovës.

Stavileci tha se përfshirja e palëve të ndryshme të interesit, në këtë rast kryetarët e komunave të Republikës së Kosovës i kontribuon shumë një bashkëpunimi edhe më të madh në mes të nivelit qendror dhe atij lokal, e sidomos të KEDS-it dhe kompanive të tjera në mënyrë që të jenë më afër me kërkesat dhe nevojat që i kanë komunat e vendit.

“Jo vetëm ky plan por edhe plane të tjera që lidhen me akterët në fushën e energjisë elektrike kanë një rëndësi të jashtëzakonshme për sektorin e energjisë elektrike”, tha ai duke shtuar se Plani  Zhvillimor i Rrjetit të Shpërndarjes është në përputhje me marrëveshjet dhe Planin investiv të KEDS-it për periudhën 2013-2017, që ka vlerë prej 100 milionë euro.

Më tej, Stavileci duke folur për ndërtimin e kapaciteteve të reja, tha se për të plotësuar kërkesat e konsumatorëve me energji elektrike, e po ashtu edhe të bizneseve, në dhjetor të vitit të kaluar është nënshkruar marrëveshja e mirëkuptimit me investitorin amerikan dhe tash jemi në përmbyllje të fazës komerciale, e cila pritet të finalizohet deri në qershor.

“Ne kemi interesimin e më shumë se 8 kompanive të njohura, lidere në prodhimin e energjisë elektrike që janë të interesuara për të qenë pjesë e ndërtimit të TC Kosova e Re dhe nga mesi i pranverës do të jemi dëshmitarë të nisjes së punimeve të projektit më të madh energjetik në vend, tek lokacioni i ri, afër ‘Kosovës B’”, tha ai.

Nga ana e tij, George Karagutoff – Drejtor Menaxhues i KEDS, theksoi se ky plan ngërthen në vete dy faktorë që janë pjesë e përmbushjes së misionit dhe vizionit të KEDS-it: Si të ndikojmë pozitivisht më së miri për popullin e Kosovës dhe cila është teknologjia dhe teknikat më të mira për modernizimin e rrjetit.

Sipas planit deri më 2025 mbi 300 milion euro investime, 3500 trafo të reja dhe të  2000 km linjë të re, uljen e humbjeve teknike dhe shumë beneficione për konsumatorët.

Enver Halimi – Kryesues i Bordit të Zyrës së Rregullatorit të Energjisë, vlerësoi se përgatitja e planeve afatgjate që mbulojnë rregullat prej së paku 10 viteve për zhvillimin e sistemit të shpërndarjes janë detyrime ligjore të përcaktuara me ligjin për energji elektrike dhe kushtet e licencës së KEDS-it dhe me rregullat për kushtet e përgjithshme për furnizim me energji elektrike.

Ai tha se ZRRE-ja ka kërkuar nga KEDS-i që në procesin e hartimit të planit të involvojë komunat e Kosovës me qëllim të identifikimit të nevojave të tyre për zgjerimin dhe modernizimin e rrjetit të shpërndarjes.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara