Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeqyteti po vuan nga tejndotja e ajrit. Shëndeti i qytetarëve po rrezikohet. Përgjegjësia më e madhe bie mbi Ministrinë e Mjedisit dhe Planifikimit Hapësinor.
Për këtë shkrim të shkurtër u nxita jo vetëm nga të dhënat lidhur me ndotjen e ajrit në kryeqytet, por edhe nga shkrimi në portalin e gazetës “Express’, me titull ‘Kosova i ka gjashtë zëvendësministra të Ambientit, kurse ajrin e kemi si në ditën e kiametit’.
Qëllimi i shkrimit nuk është ta liroj veten nga përgjegjësia, por, si thuhet ta kënaq perëndinë e të së vërtetës.
Në gazetën Express thuhet se ‘Gjashtë zëvendësministra të Ministrisë së Mjedisit dhe Planifikimit Hapësinor nuk kanë prezantuar ndonjë plan për përmirësimin e ajrit në kryeqytet’. Fatkeqësisht kjo është e vërtetë, por zëvendësministrat nuk janë bartës të këtij mëkati, sepse ata ende nuk i kanë marrë përgjegjësitë në MMPH. Në të vetmin takim me ministren jemi marrë vesh që zëvendësministrat të ngarkohen me përgjegjësi deri më 10 janar, por ndarja e punëve nuk është bërë!
Po të kthehemi të ndotja e ajrit në kryeqytet. MMPH-ja vazhdimisht po thotë se jemi duke i identifikuar ndotësit më të mëdhenj të ajrit në kryeqytet. Thua se kjo ministri është formuar tani dhe ka mbetur ende në fazën e identifikimit të ndotësve të ajrit! Mendoj se s’ka kryeqytetas që nuk i di burimet e ndotjes, ndërsa MMPH-ja ende po i identifikuaka ndotësit më të mëdhenj!
Po si të dilet nga kjo situatë, së paku përkohësisht! Mendoj se duhet te merren këta hapa, sado që hapi i parë mund të mos pëlqehen nga qytetarët:
Gjatë muajit shkurt në kryeqytet të lejohen të qarkullojnë një ditë veturat me numrin e fundit çift dhe ditën tjetër ato me numrin e fundit tek (në datat me numër çift veturat me numër çift, ndërsa në datat me numër tek veturat më nr. tek të targës);
Gjatë natës të eksportohet energji elektrike nga Shqipëria në mënyrë që KEK-u të zvogëlojë në minimum prodhimin dhe rrjedhimisht edhe ndotjen e ajrit;
Qeveria ose edhe Komuna e Prishtinës të ndajnë buxhet që, së paku, gjatë muajit shkurt thëngjilli për ngrohje në institucionet publike (aty ku është e mundur dhe aq sa lejon buxheti) të zëvendësohet me lëndë drusore (besoj se për zëvendësimin e thëngjillit me dru, në një numër të konsiderueshëm të institucioneve publikes, do të mjaftonin paratë që shpenzohen nga MMPH-ja për udhëtime jashtë vendit).
Ndoshta me këtë shkrim të shkurtër nuk do të ndikoj aspak në përmirësimin e gjendjes, por, si kanë thënë latinët ‘ E thashë dhe e shpëtova shpirtin tim’.
