Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisioni për të Drejtat e Njeriut, Barazi Gjinore, për Persona të Pagjetur dhe Peticione, i kryesuar nga Lirije Kajtazi, kryetare, mbajti mbledhjen e radhës, në të cilën ishte i ftuar U.D. i ministrit të Mjedisit dhe Planifikimit Hapësinor, Ferat Shala, për tu njoftuar më hollësisht lidhur më kërkesën e banorëve të fshatit Vranishtë, komuna e Dragashit, në lidhje më ndërtimin e hidrocentralit në këtë lokalitet, si dhe procedurat e eksproprijimit të pronave të atyre banorëve. Kryetarja e komisionit, Kajtazi, e hapi diskutimin duke e falënderuar z. Shala, dhe kërkoi nga ai që të japë sqarime përmes komunikimit të drejtpërdrejtë për shqetësimin e banorëve të fshatit Vranishtë, në mënyrë që të gjendet zgjidhja më e mirë për banorët e këtij lokaliteti. Ushtruesi i Detyrës së ministrit të MPH, Ferat Shala, iu përgjigj pyetjeve të anëtarëve të komisionit, duke bërë të ditur se ministria ka zbatuar të gjitha procedurat ligjore për dhënien e lejes së ndërtimit të kapaciteteve hidroenergjetike të parapara në strategjinë për zhvillimin e këtij sektori. Ai tutje shtoi se Legjislacioni e ka krijuar këtë mundësi dhe e qartëson tërë pozicionimin e zhvillimit ekonomik të vendit në këto zona.
“Ne kemi zbatuar të gjitha rregullat dhe procedurat që i kërkon ligji, duke i përdorur të gjithë faktorët ndërinstitucional në pushtetin lokal, atë qendror, zyrën e rregullatorit të energjisë dhe mekanizma të tjerë, pa i përjashtuar në asnjë moment debatet dhe komunikimet me qytetarët që preken nga ndërtimi i këtyre projekteve energjetike”, theksoi Shala. Ndërkaq , sekretari permanent në MPH, Arben Çitaku, sa u përket debateve publike që janë ngritur dhe janë dorëzuar nga qytetarët, është përgjegjësi e nivelit komunal, që më rastin e shpronësimit të tokave komuna është e obliguar me ligj që të mbajë debat publik, dhe e dyta, dhënia e pëlqimit mjedisor nga ana e ministrisë, si kategori e veçantë e lejes përkitazi me kapacitet që ndërtohen. Lidhur me ankesën e qytetarëve për mbajtjen e dëgjimit publik, Çitaku bëri të ditur se posedon të gjitha dëshmitë e mbajtjes se dëgjimit publik, dhe iu janë përgjigjur të gjitha brengave dhe shqetësimeve te qytetarëve.Në mbledhjen e sotme, u shqyrtua edhe ankesa e Sabit Hoxhës, nga fshati Rezallë, komuna e Skenderajt, lidhur me instalimin e tensionit të lartë mbi objektin e pikës së shitjes së karburanteve. Për çështjen në fjalë të pranishëm ishin përfaqësuesit e KEDS nga regjioni i Mitrovicës, si dhe të Drejtorisë për mbrojtje dhe shpëtim të Komunës së Skenderajt. Pas diskutimeve, komisioni kërkoi brenda një muaji, z. Sabit Hoxha t’i bëhet një zgjidhje përkitazi me ankesën e parashtruar.Komisioni funksional, gjatë ditës së sotme ka shqyrtuar edhe Projektligjin për mbrojtjen e fëmijës, i cili është në fazën e amendamentimit në këtë komision.
