Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Turqia është treguar e gatshme për të organizuar një takim të nivelit të lartë midis Ukrainës dhe Rusisë për t’i dhënë fund luftës, ka deklaruar kryetari i vendit, Rexhep Tajip Erdogan, pas bisedimeve që pati me kryetarin e Ukrainës, Vladimir Zelenski në Stamboll. Erdogan ka saktësuar me këtë rast se Ankaraja zyrtare mbështet integritetin territorial të Ukrainës. Duke folur në një konferencë të përbashkët shtypi me zotin Zelensky, Presidenti Erdogan tha se kishte diskutuar zhvillimet në lidhje me luftën në detaje, si dhe sigurinë e lundrimit në Detin e Zi, përfshirë marrëveshjen mbi eksportet e drithit, nga e cila Rusia u tërhoq në gusht të vitit të kaluar. Para takimit, Zelenskiy vizitoi një kantier detar pranë Stambollit për të inspektuar punën e prodhimit të dy luftanijeve për forcat detare të Ukrainës. Turqia është anëtare e NATO-s dhe ka mbështetur integritetin territorial të Ukrainës, por gjithashtu ka ruajtur marrëdhëniet e mira me Rusinë dhe flet rregullisht me të dyja palët në konflikt. Ajo ishte e angazhuar në ndërmjetësimin e bisedimeve për arritjen e marrëveshjes për eksportin e grurit përmes Detit të Zi, e cila hoqi një bllokadë de fakto ruse të eksporteve të grurit ukrainas.
