Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetja e LDK-së, Hykmete Bajrami, është kritikja më e drejtpërdrejtë, qoftë në Kuvendin e Kosovës, qoftë me postimet e saj të shpeshta, në diskursin lidhur me rrethanat politike e shoqërore, që po mbretërojnë në vend e më gjerë. Ajo, në deklarimet e saj realiste dhe kurdoherë të argumentuara me fakte e të dhëna reale, godet atje ku duhet goditur, gjithnjë duke i ilustruar faktet me paraqitjen e dëshmive, drejtuar sidomos kundër Qeverisë, në rastet e shumta të shkeljeve të ligjeve, abuzimeve me tenderët njëburimorë dhe skandaleve të korrupsionit, që kanë mbuluar këtë qeverisje, e cila erdhi në pushtet me kauza mashtruese dhe vazhdon të qeveris me të njëjtat.
Edhe deputetja e PDK-së, Ganimete Musliu është kritike e pakursyer nga radhët e opozitës, por ajo përdor një gjuhë më të ashpër e më diskrete, në paraqitjen e saj komunikuese, e cila nganjëherë edhe keqinterpretohet, sado që edhe kjo deputete shërbehet me fakte e dëshmi të pakundërshtueshme, por ato i manifeston me një dozë luftarake, shpeshherë të papërmbajtur. Kritikat e deputetes së PDK-së, Ganimete Musliu janë goditëse, pa ekuivoke, kryesisht pa paragjykime, por të kumtuara troç, në stilin e luftëtares drenicase, veti personale e saj, por edhe e duhur, madje edhe e domosdoshme, për rastet e caktuara.
Edhe deputetja e AAK-së, Time Kadrijaj, në fjalimet e saj në Kuvend ka paraqitje me përmbajtje kritike, të drejtpërdrejta, sidomos në atakimin e dukurive abuzuese dhe keqpërdorimit të pushtetit nga Qeveria, si dhe kundër deputetëve të Vetëvendosjes, të cilët përkrahin unanimisht vendimet e Qeverisë, edhe kur konsiderohet mirëfilli se ato janë të jashtëligjshme dhe si të tilla dërgohen në Gjykatën Kushtetuese, ku edhe shpallen të pavlefshme.
Të tria këto deputete dallohen nga të tjerat për paraqitjet e tyre pa mistifikime, pa ndrojtje dhe në mënyrë diskrete, sikur bëjnë një pjesë e madhe e deputeteve në përpjekje për t’ u paraqitur të moderuara, evropiane, qytetare të botës.
Në mesin e deputetëve për kritika konstruktive dhe të pandërprera, drejtuar Qeverisë-Kurti prin Maratonomaku i AAK-së, Besnik Tahiri, i cili në fjalimet e tij në Kuvend, por edhe në postimet autoriale, vazhdimisht kritikon me fakte e argumente të forta, dhe nuk lë vend për kundërvënie, meqë në segmentet kryesore të diskursit të tij politik, është realist, serioz në qëndrime i përmbajtur dhe largpamës.
