Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një intervistë për Televizionin Dielli, kryetari i komunës së Hanit të Elezit, Rufki Suma ka thënë se ne të gjithë e dimë, si Kosova ashtu edhe faktori ndërkombëtar, se kush ka luftuar për të drejtat e veta dhe kush ishte okupatori. Serbia terrorizoi, largoi nga puna dhe masakroi mijëra njerëz dhe si pasojë e krejt kësaj ndodhi bombardimi i Serbisë nga NATO por fatkeqësisht pas luftës, rolet u ndërruan. Serbia si okupatore që ishte po shndërrohej në viktimë gjë që rezultoi me krijimin e Gjykatës Speciale. Fajtorët kryesorë për formimin e Gjykatës speciale janë institucionet tona. Të gjithë e dimë se çfarë presioni ju është bërë deputetëve për ta nënshkruar krijimin e kësaj Gjykate me arsyetimin se po të mos e bënim ne, do ta bënte OKB-ja. Por kjo nuk qëndron ngase më herët ishte Gjykata e Hagës dhe Kosova ishte pjesë e saj, ku qytetarët tonë u gjykuan për krime. Sikur nuk mjaftonte ajo, janë edhe gjykatat e EULEX-it që po dënojnë çlirimtarët tonë pa pasur fakte. Turpi më i madh dhe krimi mbi krim që bërë faktori ndërkombëtar ndaj Kosovës është krijimi i Gjykatës Speciale.
Nëse shkohet me këtë logjikë, atëherë shtrohet pyetja: Pse NATO-ja bombardoi Serbinë? Në këtë rast, Serbisë i hapet rruga ta padisë edhe NATO-n. Assesi nuk është dashur të lejohet themelimi i kësaj gjykate për krimet që pretendohet që i ka kryer Ushtria Çlirimtare e Kosovës. Është e turpshme dhe e ulët të mendohet se gjatë kohës së luftës ka pasur mundësi të bëhet transplantim i organeve nga shqiptarët, ka thënë ndër të tjera gjatë intervistës për Televizionin Dielli kryetari i Komunës së Hanit të Elezit, Rufki Suma.
