Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shkurtimisht, mendoj se shqiptarët duhet të dinë se çfarë duhet të presin nga politikanët dhe pushtetarët e tyre. Duhet të dinë t’i zgjedhin ata të cilët duhet dhe që i duhen atdheut dhe shqiptarëve. Shqiptarët duhet të dinë se elita politike e tyre dhe sundimtarët e tyre në Shtetin e tyre nuk kanë qenë fisnikëria, as burrëria dhe as krenaria kombëtare, as virtyti e as vlerat; nuk kanë qenë ata të cilët kanë meritat dhe as ata të cilët kanë sakrifikuar më së shumti për Shqipërinë, por kanë qenë dhe janë ata të cilët i kanë dëbuar, përndjekur dhe që i kanë edhe vrarë ata të cilët jipnin gjithçka, edhe jetën për atdheun.
Shqiptarët nuk duhet të presin dhe as të tolerojnë e të mashtrohen prej gënjeshtrave, korrupsionit dhe prej mashtrimeve të politikanëve e pushtetarëve të tyre, si dhe duhet t’i ndëshkojnë mëkatet e tyre: sidomos mëkatin e tradhtisë, të premtimeve mashtruese dhe korrupsionin e tyre.
2-Shqiptarët duhet të ndëshkojnë padrejtësitë dhe jo të largohen nga atdheu prej tyre; duhet të jenë të ndërgjegjësuar dhe të dinë e te njohin forcën e tyre kombëtare si të pasfidueshme nga asnjë shtet e komb tjetër si dhe as nga asnjë pushtet, dhe se mbipushteti është vetëm vullneti i tyre patriotik, inteligjent, i drejtë dhe i pamanipuluar.
3- Shqiptarët duhet të dinë se pa mposhtur inatin, xhelozinë dhe sidomos egoizmin kundër virtytshmërisë, vlerave kombëtare dhe moralitetit human; pa mposhtur egoizmin dhe urrejtjen kundër të merituarve, të dinjitetshmëve dhe patriotizmit nuk mundet që të çlirohen energjitë vitale zhvillimore politike, patriotike, kombëtare, demokratike, intelektuale, akademike e shkencore, ekonomike etj.
A nuk e shohim se si në Shqipëri persekutohen vlerat me shume finese dhe djallëzi. Askund në politikë, as në diplomaci, as në parlament , as nëpër pushtet, as në drejtësi as në akademi nuk kanë vend pasardhës të familjeve fisnike dhe kombëtare, as talenti, as dhuntia, as profesionalizmi dhe as atdhetarizmi. Sot truri dhe inteligjenca shqiptare po marrin arratinë. Për pak kohë në Shqipëri e as në Kosovë ndoshta nuk do të ketë as shkencëtarë, as mjekë e madje as ustallarë e as elektricistë.
4- Shqiptarët duhet ta dinë pse edhe sot shqiptarët ikin nga Shqipëria. Dihet se ikën dhe u dëbuan shqiptarët e Çamërisë prej krimit, terrorit dhe genocidit grek; dhe ikën e u dëbuan në vitin 1999 një milion shqiptarë nga Kosova prej regjimit kriminal e genocidial serb.
Por shqiptarët duhet ta dinë por besoj se edhe e dinë pse duan të ikin edhe sot nga Shqipëria 79% e të rinjve shqiptarë sipas Gallup-it –organizatës e cila bën anketim mbarë global?!
Pse, pra?!
Këtë e dinë shqiptarët po pse nuk reagojnë kundër atyre të cilët ua imponojnë ikjen dhe braktisjen e Shqipërisë!? Pse-në e mosreagimit kundër këtij imponimi nuk po dihet se a e dinë apo jo shqiptarët!!?? Nuk po dihet edhe PSE-ja tjetër, ajo se përse qytetarët shqiptarë nuk u shkojnë pas atyre të cilët u thonë të vërtetat, atyre të cilët sakrifikojnë nga vetja e tyre energjinë intelektuale, guximin intelektual e patriotik për të mirën publike, por më shumë lexojnë thashethemnaja të mediave mercenare dhe intelektualizmin shterp, ordiner e negativ dhe merren me vogëlsira, ngatërresa e thashetheme nder vete dhe nuk solidarizohen e nuk mbështesin të vërtetat qe demaskojnë politikën dhe drejtësinë e kriminalizuar e të korruptuar. Pse p.sh. nuk e mbështesin sa dhe si duhet publikisht dhe mediatikisht VETTING-un, pse nuk e inkurajojnë punën e tij?!
Pra, shqiptarët duhet të ndahen, ta ndëshkojnë dhe ta mposhtin jo vetëm egoizmin e tradhtinë por edhe hipokrizinë.
Sot kombëtarët, nacionalistët, patriotët dhe inteligjencën nuk i internojnë dhe as nuk e pushkatojnë siç bëri diktatura komuniste, por i izolon, i streson dhe i dëbon “indiferentizmi demokratik” djallëzor i politikës të cilën e kanë pronë të tyre trashëgimtarët dhe pinjollët e nomenklaturës së komunizmit, krimi, korrupsioni ,trafikantët e votave dhe të drogës, injoranca dhe tradhtia.
5- Shqiptarët duhet ta dinë e t’i njohin mirë armiqtë tradicionalë dhe të egër të tyre. Duhet të jenë vigjilentë dhe syhapur e të përgatitur politikisht, diplomatikisht dhe sidomos ushtarakisht, sepse pavarësisht se Shqipëria është në NATO dhe Pavarësisht synimeve të Shqipërisë e të Kosovës për në BE, dhe pavarësisht globalizmit: sllavo-grekët kurrë nuk do të heqin dorë nga antishqiptarizmi e shovinizmi i egër i tyre, nuk do të heqin dorë as nga provokacionet dhe përpjekjet e tyre për destabilizimin e Shqipërisë dhe as nga diversionizmi dhe financimet për të blerë tradhtinë dhe agjentë nga radhët e politikës, pushtetarëve dhe të medieve shqiptare siç u bë publik edhe rasti më i fundit ku politikanë e mediet greke deklaruan se ministria e tyre e jashtme paska fonde sekrete për të blerë media, politikanë dhe për të financuar edhe Kishën Ortodokse për të lobuar në Shqipëri për interesa të Greqisë.
6- Shqiptarët duhet të njohin, të dinë dhe të respektojnë aleatët e vërtetë, besnikë e seriozë të tyre, e që SOT janë Shtetet kryesore të BE-së, dhe sidomos SHBA , aleati jetik strategjik global i shqiptarëve, si dhe Turqia e Kroacia si aleatë besnikë rajonal në Ballkan. Dhe po kështu ndaj tyre duhet që edhe shqiptarët të jenë për ta aleatë besnik, të qëndrueshëm dhe mirënjohës reciprokisht ndaj tyre.
7-Shqiptarët duhet ta dinë se koha punon tani për të vërtetën, për shqiptarizmin më shumë se kurrë. Kurrë më e favorshme se sot për shqiptarët nuk ka qenë koha. Prandaj duhet të shpejtojmë që ta kapim kohën dhe të jemi në kohë, se mjaft na kanë penguar të tjerët, dhe mjaft jemi të vonuar në rrugën e Bashkimit Kombëtar, të mirëqenies dhe të qytetërimit.
8-Është koha që shqiptarët duhet të bëhen e të ndjehen thellë, shpirtërisht si shqiptar. Për shqiptarët Shqipëria është e para.
