Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot Kosova ka shtetin e vet, ka pavarësinë dhe institucionet demokratike dhe politike të veta. Sot në Kosovë është prezent perëndimi dhe ndihma e kontributi i tij i gjithanshëm për shtetndërtimin e Kosovës.
Pavarësisht këtyre opinioni qytetar dhe publiku kosovar sot ankohen për mungesa të shumta dhe të mëdha, ankohet për mosliri dhe për mos të drejta demokratike, politike, sociale dhe ekonomike. Sot pothuajse qytetaret ankohen për të gjitha, edhe për pronën, edhe për punë, edhe për mos qetësi e mos siguri për jetën, punën, pronën dhe për mos sigurinë ekonomike. Sot në Kosovë gjithëçka pothuajse vetëm sa importohet nga jashtë, nuk ka prodhime vendore veshmbathje, as industriale dhe as ushqimore. Vëndin e sundojnë monopoli i kontrabandës dhe i korrupsionit politik dhe abuzivizmi e keqpërdorimi korruptiv i parasë publike. Nuk ka asnjë plan rregullues urbanistik, por ka një katrahurë urbane ,mjedisore dhe degradim të territorit. Jeta e qytetarëve sidomos në kryeqytetin Prishtinë është e rrezikuar nga ndotja shumë e lartë e tij,si ajo e ajrit, akustike dhe ajo me mbeturinave urbane dhe ndërtimore. Betonizimi i eger i qyteteve nuk ka lënë hapësira të lira të gjelbërta pushimi për qytetarët dhe as vënde parkimi për automjetet.Kjo vjen si pasojë e asaj se Kosova sot , qytetaret e saj vuajnë nga padrejtesia, nga mos sundimi i ligjit dhe nga mos realizimi, mos ndërtimi dhe mos funksionimi i ligjit dhe as i shtetit ligjor. Kosova ka një rrjet hotelerish, restorantesh e kafenesh aq shumë sa të lë përshtypjen sikur Kosova ka popullsi 20 milion banorë.
Në Kosovë ka sot një ushtri të madhe të diplomuarish, ku shumica janë ata me diploma të blera dhe të marra me ryshfet, para dhe për meritë militantizmi “politik”partiak , dhe këta janë pikërisht ata më të përzgjedhurit dhe të privilegjuarit për karrierë e “kompetencë” politike dhe për poste pushteti qendror e vendor, në arsim dhe shëndetësi, dhe kudo nëpër administratën parlamentare, qeveritare ,vendore , si profesorë e doktorë dhe deri dhe ty të gjithë diplomatët.
Shoqëria kosovare sot është bërë apatike dhe indiferente; është jo kërkuese, as vigjilente dhe as rezistente ndaj të këqijave që asaj i vijnë nga politika e partive politike, e udhëheqësve të tyre, ku partitë politike e kanë parcelizuar dhe përçarë shoqërinë duke e demoralizuar dhe humbur edhe solidaritetin ndërqytetar. Politika dhe politikanët shqiptarë kanë injektuar në shoqërinë kosovare edukatën negative masive që është : servilizmi dhe nënshtrimi masiv ndaj politikës së injorancës, të krimit dhe të korrupsionit.Pra kërcënimi shoqërisë në Kosovë sot nuk i vjen më nga pushtuesi i huaj, por i vjen nga padrejtësia e drejtësisë si dhe nga politika e korrupsionit dhe ajo e kriminalizuar të cilat prishin shoqërinë dhe e shkatërrojnë funksionimin e saj.
Kosova sot funksionon si një rrumpallë demokratike, ku vetëm demokraci nuk ka as në partitë politike të cilat funksionojnë si prona njerëzore të bajraktarëve të rinj të cilët kanë dhe mishërojnë një përzjerje sjelljesh dhe kulture katundareske e komuniste si kokëfortësinë, egoizmin, autokracinë e neveritshme, papërgjegjshmërinë , urrejtjen dhe nihilizmin për intelektualizmin, aftësinë, moralitetin dhe për patriotizmin real. Kjo gjëndje e tillë në Kosovë vjen sepse janë lart ,atje ku vetëm ata nuk duhet të jenë. Ata janë në parlament , në qeveri ,në komuna, në administratë dhe në prokurori e gjykatë, atje janë ata të cilët nuk kanë as kapacitete intelekltuale dhe as traditë trashëgimie patriotike dhe as kulturore e as trashëgimi pasurore. Për pasojë të tillët e mbajnë peng zhvillimin demokratiko-ligjor, e mbajne peng shtetin ligjor, e mbajnë peng zhvillimin ekonomik, progresin demokratik si dhe integrimin e Kosovës në BE.
