Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas një viti pauzë, sot pritet që në Gjykatën e Prishtinës të vazhdojë procesi gjyqësor kundër Ukë Ibrahim Rugovës, i akuzuar se ishte pjesë e një grupi që furnizonin individë me viza Schengen të BE-së nga Ambasada italiane në Prishtinë, të cilat janë marrë në mënyrë të paligjshme ose përmes korrupsionit. Kur kanë kaluar më shumë se një vit qëkur është mbajtur seanca e fundit ndaj Ukë Rugovës, Gjykata Themelore e Prishtinës më në fund ka caktuar seancën e këtij gjykimi. Që nga koha kur EULEX-i e ka përfunduar mandatin në Kosovë dhe pasi që lënda është transferuar te gjyqtarët vendorë nuk është mbajtur asnjë seancë gjyqësore, me qëllim që lënda të vjetërohet. Më 30 janar 2018 EULEX kishte hequr dorë nga gjykimi i këtij rasti, duke e transferuar atë te vendorët. Sipas aktakuzës së përpiluar nga Prokuroria Speciale, Ukë Rugova ishte pjesë e një grupi kriminal, qëllimi i të cilit ishte përfitimi material, duke furnizuar individë me viza Schengen të BE-së nga Ambasada italiane në Prishtinë, të cilat janë marrë në mënyrë të paligjshme ose përmes korrupsionit. Sipas aktakuzës plot 556 viza Schengen ishin marrë nga Ambasada e Italisë në Prishtinë në lidhje me aktivitetet e grupit. Së bashku më Ukë Rugovën në këtë rast janë të akuzuar edhe 20 persona të tjerë, ndër ta edhe ish-ministri, Astrit Haraqija.
