Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në ambientet e Radios Kosova e Lirë, u zhvillua një vizitë ngushëlluese me vlera të veçanta shpirtërore e kombëtare nga profesori i njohur, Skënder Demaliaj, i shoqëruar nga bashkëshortja e tij, znj. Albana Maliqi-Demaliaj. Kjo vizitë u realizua në nderim dhe kujtim të jetës dhe vepës së ndritur të drejtorit të ndjerë të Radios Kosova e Lirë, profesor Ahmet Qeriqi.
Çifti Demaliaj shprehën ngushëllimet më të thella dhe fjalët më të përzemërta për ndarjen nga jeta të profesor Qeriqit, duke e cilësuar vdekjen e tij si një plagë të madhe jo vetëm për familjen dhe miqtë, por për gjithë kombin shqiptar.
“Profesor Ahmeti ishte zëri i ndërgjegjes kombëtare, një figurë e rrallë e kulturës, letërsisë dhe publicistikës shqiptare. Ai i dha shumë gjuhës, identitetit, historisë dhe shtetësisë së Kosovës. Kontributi i tij është i pashlyeshëm dhe i pavdekshëm,” u shpreh profesori Demaliaj gjatë kësaj vizite të mbushur me ndjenja të thella respekti dhe mirënjohjeje.
Znj. Albana Maliqi-Demaliaj, me emocion të veçantë, vlerësoi angazhimin e palodhur dhe devotshmërinë e profesor Qeriqit përmes fjalës së shkruar dhe asaj të folur, duke thënë se ai ishte një urë lidhëse ndërmjet brezave dhe një dritare për të vërtetën shqiptare në periudha të vështira.
Vizita e çiftit Demaliaj në Radion Kosova e Lirë shërbeu si një dëshmi e respektit të thellë që ai gëzonte në mesin e intelektualëve dhe dashamirëve të çështjes kombëtare. Ata u shprehën se kujtimi për profesor Ahmet Qeriqin do të mbetet gjithmonë i gjallë dhe frymëzues për brezat që vijnë.
