Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Libri “Mendime të arta” i profesor, Enver Llumnicës, është një libër në vete me vlera njohëse të pakrahasueshme, që përmban informacion të gjithanshëm nëpërmjet fjalëve të urta, aforizmave dhe thënieve filozofike të njerëzve të shquar. Tematika e fjalëve të urta popullore dhe e aforizmave në faqet e këtij libri kaq interesant është tepër e gjerë dhe tëpër e larmishme. Mund të thuhet se s’ka aspekt të jetës së njeriut, s’ka cep të mendimit e të psikologjisë së tij, ku të mos ketë depërtuar drita e fuqishme e syrit të mprehtë dhe e mençurisë së proverbit dhe e aforizmit, të përzgjedhur nga autori Enver Llumnica.
Në këtë mënyrë, njeriu me anën e proverbave shtron dhe zgjidh probleme që i kanë dalë në jetë gjatë historisë. Dhe ai përpiqet t’i shohë këto probleme në poliedricitetin e tyre, të depërtojë në thellësinë e tyre, t’i ndriçojë nga të gjitha ato anë që paraqesin interes. Për këtë arsye janë krijuar një varg proverbash rreth të njëjtit problem, fenomeni, situate, etj., që plotësojnë njëri-tjetrin dhe në tërësinë e tyre e japin mendimin për këtë problem në gjithë gjerësinë e thellësinë e tij. Siç thamë edhe më lartë, tematika e proverbave e përmbledhjes “Mendime të arta” të autorit Llumnica është e gjerë dhe e larmishme, ajo përfshin: atdheun, vendlindjen, lirinë, dinjitetin trimërinë, besën, punën dhe qëndrimin ndaj saj, disiplinën në punë, kursimin, miqësinë dhe bashkimin, bujarinë, mirësinë, mirënjohjen, drejtësinë, ndershmërinë, të vërtetën, sinqeritetin, aftësinë dhe mençurinë, maturinë, masën, kujdesin, mirëbesimin, fjalën dhe veprën, aftësimin mendor dhe pajisjen me njohuri, urtësinë, fjalën e ëmbël, thjeshtësinë, diturinë, përvojën, edukatën, traditën, sjelljen dhe veprimet, jetën e optimizmin, njeriun, mjedisin dhe individin, kolektivin, rininë dhe pleqërinë, rregullsinë, zhvillimin, familjen, farefisin, fqinjësinë, mënyrën e jetesës, mjetet materiale, njeriun, mjeshtëritë, motin, gjendjet, marrëdhëniet klasore, shtetin, politikën, fenë, klerin, psikologjinë, etj. Dhe, kështu vërtet kjo përmbledhje na del një enciklopedi në vete e mendimit njerëzor.
Prandaj, ne Profesorin e nderuar z Enver Llumnica e urojmë dhe e përgëzojmë për këtë përmbledhje kaq interesante, kurse lexuesve tanë të shumtë u urojmë lexim të këndshëm!
Besianë, më 14 prill 2023.
